ریاض (گلف آن لائن)سعودی عرب میں بازوں کے بین الاقوامی نیلام کے آخری روز دنیا کا مہنگا ترین جیرنسل کا باز پیش کیا گیا۔ بازوں کے ایک تربیت کار نے یہ باز 17.5 لاکھ ریال میں خرید لیا۔ نیلام کا انعقاد دارالحکومت ریاض کے شمال میں ملہم میں واقع سعودی فیلکن کلب میں ہوا۔عرب میڈیا کے مطابق مذکورہ باز کی اصل ملکیت امریکا کے پیسیفک نارتھ ویسٹ فارم کے پاس ہے۔ یہ دنیا بھر میں بازوں کا اعلی ترین فارم ہے۔
فروخت ہونے والا باز الٹرا وائٹ جیر ہے۔ اس کی لمبائی 16.5 انچ اور وزن 980 گرام ہے۔یہ دنیا بھر میں پہلا موقع تھا جب جیرباز کو کسی نیلام میں فروخت کے لیے پیش کیا گیا۔ملہم میں اس نیلام کا آغاز گذشتہ ماہ 5 اگست کو ہوا تھا۔ اس دوران میں بازوں کی فروخت کی ریکارڈ ڈیل دیکھی گئیں۔ ان میں نادر حسن کے حامل کینیڈین باز کی 3.5 لاکھ ریال میں فروخت شامل ہے۔ نیلام میں 14 ممالک سے لائے گئے اعلی ترین نسل کے باز پیش کیے گئے۔
واضح رہے کہ جیرکو دنیا میں مہنگا ترین باز شمار کیا جاتا ہے۔نیلام کے آخری روز تین بازوں کے حوالے سے سخت مقابلہ دیکھنے میں آیا۔ یہ تین باز مجموعی طور پر 19.9 لاکھ ریال میں فروخت ہوئے۔یہ نیلام 5 اگست سے 5 ستمبر تک ایک ماہ جاری رہا۔ اس دوران میں فروخت ہونے والے بازوں کی مجموعی قیمت 43.86 لاکھ ریال رہی۔
