لاہور(گلف آن لائن)سینئر اداکارہ بشریٰ انصاری نے کہا ہے کہ مجھے ایک نہیںمتعدد بار فلموں میں کام کرنے کی پیشکش ہوئی لیکن صاف انکارکردیا ،اس وقت اپنی فیملی سمیت امریکہ میں پائوں جما سکتی تھی جب گرین کارڈ ائیر پورٹ پر مل جاتا تھا۔ایک انٹرویو میں بشریٰ انصاری نے کہاکہ میںنے بچوںکے شو میں گایابھی ہے ،ٹی وی پر بھی اداکاری کی ہے لیکن میرا فلموںمیںکام کے حوالے سے کبھی کوئی رجحان نہیںرہا۔مجھے ایس سلیمان،سید نورسمیت کئی ہدایتکاروں نے کہا کہ آپ کے لئے بڑے زبردست کردارہیں لیکن میں نے کبھی اس کیلئے مشاورت کیلئے وقت نہیں مانگابلکہ صاف انکارکردیا۔
بشریٰ انصاری نے کہا کہ دنیا میں پاکستان جیسا کوئی ملک نہیں ،ہمیں اس سے بے پناہ پیار ہے ۔میں اس وقت فیملی کے ہمراہ امریکہ گئی تھی جب آپ کیلئے پائوں جمانا مشکل نہیں ہوتاتھااورگرین کارڈتوائیر پورٹ پر مل جاتاتھا۔ میں کچھ دیر وہاں رہی لیکن اپنے شوہرسے کہا کہ آپ یہاں رہیںمیں پاکستان واپس جائوں گی اورہم واپس آگئے ۔
