عمران اسماعیل

امپورٹڈ حکومت جو چاہے کرلے ہمیں ان سے کوئی خوف نہیں، عمران اسماعیل

کراچی(گلف آن لائن)پاکستان تحریک انصاف کے رہنمااور سابق گورنرسندھ عمران اسماعیل نے کہاہے کہ امپورٹڈ حکومت جو چاہے کرلے ہمیں ان سے کوئی خوف نہیں،پی ٹی آئی واحد جماعت ہے جو عوام کے فنڈز سے چلتی ہے۔سندھ ہائیکورٹ کے باہرمیڈیا سے گفتگو کرتے ہوئے سابق گورنر سندھ عمران اسماعیل نے کہا کہ ہمارے پاس دوسروں کی طرح فارن فنڈنگ نہیں، کون بھارت سے پیسے لیتا رہا، بے نظیر کی حکومت گرانے کیلئے اسامہ بن لادن سے پیسے لئے گئے۔

انہوں نے کہا کہ پی ٹی آئی نے چالیس ہزار ٹرانزیکشن کے شواہد پیش کیے، یہ لوگ انتخابات سے ڈرے ہوئے ہیں ایسی جگہ پھنس گئے ہیں کہ انتخابات کرائیں گے تو عمران خان دو تہائی سے زیادہ اکثریت لے کر آئیں گا۔انہوں نے کہاکہ ہم ایف آئی اے کے نوٹس کو چیلنج کرنے آئے ہیں، اسد قیصر کو پشاور ہائی کورٹ سے ریلیف ملا ہے۔

عمران اسماعیل نے کہا کہ تیس سال سے عمران خان نے ہمیں جنگ کرنا سکھایا ہے، جو دھمکیاں امپورٹڈ حکومت دے رہی ہے اس سے ہمیں کوئی خوف نہیں۔سابق گورنر سندھ نے کہاکہ یہ ہمیں جتنا تنگ کریں گے اتنا ہم آگے بڑھیں گے، گارنٹی دیتا ہوں یہ حکومت اگلے تیس دن نہیں دیکھے گی۔عمران اسماعیل نے کہا کہ آئندہ الیکشن کا اعلان ہونے والا ہے، چودہ اگست کے جلسے میں عمران خان لائحہ عمل کا اعلان کریں گے۔

اپنا تبصرہ بھیجیں