کراچی(گلف آن لائن) امیر جماعت اسلامی کراچی حافظ نعیم الرحمن نے مطالبہ کیا ہے کہ پولنگ اسٹیشنز پر انتخاب والے دن آرمی اور رینجرز کا تقرر کیا جائے، الیکشن کمیشن سے درخواست ہے ایڈمنسٹرئٹر کو برطرف کیا جائے تاکہ ایسا لگے کہ انتخابات شفاف ہوں۔ادارہ نورحق میں پریس کانفرنس کرتے ہوئے امیر جماعت اسلامی کراچی حافظ نعیم الرحمان نے کہا کہ الیکشن کمیشن نے کل حتمی طور پر فیصلہ کیا ، بلدیاتی انتخابات 23 اکتوبر کو ہوں گے۔انہوں نے کہا کہ پولنگ اسٹیشنز پر انتخاب والے دن آرمی اور رینجرز کا تقرر کیا جائے، شہریوں کو اعتماد حاصل ہو کہ پولنگ اسٹیشنز رینجرز اور فوج ہوگی۔
انہوں نے کہاکہ الیکشن کمیشن سے درخواست ہے ایڈمنسٹرئٹر کو برطرف کیا جائے تاکہ ایسا لگے کہ انتخابات شفاف ہوں، ایڈمنسٹریٹر جو سیاسی جماعت کا ہو سینیٹر رہا ہو اسے برطرف کیا جائے ۔انہوں نے کہا کہ مراد علی شاہ جمہوریت کے خلاف سازشیں بند کردیں اور قبول کرلیں کہ آپ نے بلدیاتی انتخابات کروانے ہیں کیونکہ اب پیپلز پارٹی کی کوئی سازش کامیاب نہیں ہوگی ۔
انہوں نے کہا کہ اگر انہوں نے انتخابات کو دو حصوں میں کروانے کی سازش کی تو زبردست مزاحمت ہوگی، دیگر شہروں سے نفری منگائیں اور ہر صورت انتخابات کرائیں ۔امیر جماعت اسلامی کراچی نے کہا کہ سعید غنی نے کا کہنا ھے کہ کراچی کے لوگ خود اپنے مسائل پیدا کرتے ہیں، سعید غنی یہ بتائیں آپ نے 14 سال میں کراچی کو کیا دیا۔
انہوں نے کہا کہ پولیس میں جعلی بھرتیاں کی ہیں، جس کی وجہ سے اسٹریٹ کرائم بڑھتے جا رہے ہیں، آپ خود کچھ کرتے نہیں اور کراچی کے عوام کے زخموں پر نمک پاشی کرتے ہیں۔اب اندرون سندھ بھی آپ سے الگ ہوگا۔
