راولپنڈی (گلف آن لائن)آرمی چیف سید عاصم منیر کی ہدایت پر پاک فوج کے 2 دستے ترکیہ بھیج دیئے گئے ۔پاک فوج کے شعبہ تعلقات عامہ (آئی ایس پی آر) کے مطابق جنرل ساحر شمشاد مرزا چیئرمین جوائنٹ چیفس آف سٹاف کمیٹی، سروسز چیفس اور پاکستان کی مسلح افواج نے ترکیہ میں زلزلہ کے متاثرین سے گہری ہمدردی اور تعزیت کا اظہار کیا ہے۔
بیان میں بتایا گیا کہ چیف آف آرمی سٹاف جنرل سید عاصم منیر کی ہدایت پر پاک فوج نے اربن سرچ اینڈ ریسکیو ٹیم کے 2 دستے بھیجے گئے جس میں ریسکیو ماہرین، جاسوس کتے، تلاشی کے آلات اور آرمی ڈاکٹروں، نرسنگ اسٹاف اور ٹیکنیشنز پر مشتمل ایک میڈیکل ٹیم کے علاوہ 30 بستروں والا موبائل ہسپتال، خیمے، کمبل اور دیگر امدادی اشیا شامل ہیں۔
بیان میں بتایا گیا کہ امدادی سامان لے کر پاکستان ایئر فورس کا خصوصی طیارہ ترکیہ کے شہر اڈانا کے لیے 6 اور 7 فروری کی رات کو روانہ ہو گیا تھا جو ترکیہ کی حکومت اور ان کے اسلام آباد میں سفارتخانے کے ساتھ قریبی تعاون کے ساتھ ترکیہ کے لوگوں کی ریلیف کی کوششیں میں حصہ لیں گے۔آئی ایس پی آر کے مطابق امدادی ٹیمیں ریسکیو اور ریلیف آپریشن مکمل ہونے تک وہاں پر موجود رہیں گی
