لاہور (گلف آن لائن)پشاور زلمی کے کپتان بابر اعظم نے کہا ہے کہ لاہور قلندرز کے خلاف میچ میں بولنگ اچھی نہیں ہوسکی، اونچ نیچ ہوتی رہتی ہے۔
میڈیا سے گفتگو کرتے ہوئے بابر اعظم نے کہا کہ پشاور زلمی کے ساتھ مزہ آیا بدقسمتی سے آگے نہیں جاسکے۔انہوں نے کہا کہ اپنے لیے جوگول بنایا تھا وہ حاصل کیا انجوائے کیا، لیکن انفرادی کارکردگی سے بڑھ کر ٹیم کی کارکردگی کی اہمیت ہوتی ہے۔پشاور زلمی کے کپتان نے کہا کہ پاکستان کی کرکٹ گروم کر رہی ہے، صائم ایوب اور محمد حارث سامنے آئے ہیں۔انہوں نے کہاکہ یہ اچھی بات ہے کہ نوجوان مواقع سے فائدہ اٹھا رہے ہیں جس کا پاکستان کو فائدہ ہو گا۔بابر اعظم نے کہا کہ میری وکٹ غلط وقت پر گری، لاہور قلندرز کو کریڈٹ دینا چاہیے، حارث رئوف نے اچھی بولنگ کی۔
انہوں نے کہا کہ محمد حارث کو پلان کے مطابق کھلاتے رہے ہیں، اْس نے بیٹنگ نمبر میں تبدیلی کو مثبت انداز میں لیا۔پشاور زلمی کے کپتان نے کہا کہ نوجوان کرکٹرز کو بیٹنگ نمبر سے فرق نہیں پڑتا، محمد حارث کو ہمیشہ یہی بتاتا ہوں کہ اننگز کو لمبی کرو۔انہوںنے کہاکہ نوجوان پلیئرز کا آگے آنا بہت اچھی بات ہے، پی ایس ایل میں ہر سال نئے سے نیا ٹیلنٹ سامنے آتا ہے۔بابر اعظم نے کہا کہ صرف لاہور میں نہیں ملتان کراچی اور راولپنڈی میں بھی سپورٹ ملی، ہر جگہ مجھے سپورٹ ملتی ہے جو کہ اچھی بات ہے۔
