لاہور (گلف آن لائن) الیکشن کمیشن آف پاکستان (ای سی پی) کی ہدایات کے بعد وزارت بین الصوبائی رابطہ (آئی پی سی) نے نگران وزیراعظم کے پرنسپل سیکرٹری کو لکھے گئے ایک نوٹ میں پاکستان کرکٹ بورڈ (پی سی بی) میں ذکاءاشرف کی تقرری پر نگران وزیراعظم سے مشورہ طلب کیا ہے۔
اس ماہ کے شروع میں جاری ہونے والے ای سی پی کے ایک نوٹیفکیشن کا حوالہ دیتے ہوئے، آئی پی سی کی وزارت نے وزیر اعظم ہاؤس کو مطلع کیا کہ انتخابی ادارے نے سیاسی بنیادوں پر تعینات تمام اداروں کے سربراہوں کی خدمات کو ”ختم” کرنے کا حکم دیا ہے۔
اپنے ”نوٹ” میں وزارت نے وزیر اعظم ہاؤس سے کہا ہے کہ وہ پی سی بی کی مینجمنٹ کمیٹی (ایم سی) کے چیئرمین ذکا اشرف کی تقرری پر غور کرے اور ”مناسب احکامات” جاری کرے۔اس سے ظاہر ہوتا ہے کہ اشرف کو پی سی بی کے سربراہ کے عہدے سے ہٹایا جا سکتا ہے اور اس خیال کو تقویت ملی ہے کہ اس عہدے کے لیے کوئی نیا نام سامنے آ سکتا ہے۔
جولائی کے شروع میں، اشرف کو ایک نئے ایم سی کا سربراہ نامزد کیا گیا تھا جو اس وقت کے آئی پی سی وزیر احسان مزاری کے مطابق پی پی پی کی قیادت کی خواہش کے بعد تشکیل دیا گیا تھا۔ذکاءاشرف نے ایم سی کے سابق چیئرمین نجم سیٹھی کی جگہ لی، جو پہلے ہی چیئرمین شپ کی دوڑ سے دستبردار ہو چکے تھے۔ واضح رہے کہ پاکستانی ٹیم اس وقت سری لنکا میں افغانستان کے خلاف ون ڈے سیریز کھیل رہی ہے۔
پہلے میچ سے قبل، اشرف نے پاکستانی کھلاڑیوں سے ملاقات کی اور اس سال کے آخر میں بھارت میں ہونے والے ایشیا کپ اور آئی سی سی ورلڈ کپ سے قبل ان کی حمایت کی۔ پاکستانی کھلاڑیوں کے سینٹرل کنٹریکٹس کا معاملہ بھی ابھی تک حل طلب ہے۔ معاہدے کی میعاد رواں سال 30 جون کو ختم ہو گئی تھی۔
