لاہور(نیوز ڈیسک)تحریکِ انصاف کے رہنما بیرسٹر علی ظفر نے کہاہے کہ عوامی پزیرائی اتنی زیادہ ہے کہ لیول پلینگ فیلڈ نہ ہونے کے باوجود ہمیں نقصان کا خدشہ نہیں، انتخابات کے لیے پی ٹی آئی کے پاس لیول پلینگ فیلڈ موجود نہیں اور دی بھی نہیں جا رہی، الیکشن کمیشن کے سامنے لیول پلینگ فیلڈ کے حوالے سے بار بار اپنے خدشات رکھے ہیں۔ لاہور ہائی کورٹ کے باہر میڈیا سے گفتگو کرتے ہوئے بیرسٹر علی ظفر نے کہا کہ سپریم کورٹ 90روز میں انتخابات کرانے کے اپنے فیصلے پر عمل بھی کرائے،
الیکشن کمیشن کی جانب سے انتخابی شیڈول کا اجرا آئین کی توہین ہے،انہوں نے کہا کہ کوئی ادارہ 90دن سے آگے انتخابات کی کوئی تاریخ نہیں دے سکتا، انتخابات کی تاریخ دینا صدر کا آئینی استحقاق ہے، آئینی بحران نمٹانے کی ساری ذمے داری سپریم کورٹ کے کندھوں پر آن پڑی ہے، سپریم کورٹ کے فیصلے سے ہی انتخابات ہونے یا نہ ہونے کی افواہیں ختم ہوں گی،بیرسٹر علی ظفر نے کہا کہ سپریم کورٹ انتخابات کرانے کے حوالے سے سپریم کورٹ بار اور پی ٹی آئی کی درخواستوں پر فیصلہ سنائے۔
