لاہور (نمائندہ خصوصی ) وفاقی وزیر برائے منصوبہ بندی و ترقی احسن اقبال نے کہا ہے کہ ارشد ندیم کے والد نے بتایا انہوں نے رزق حلال سے بچوں کو پالا ہے۔ احسن اقبال نے ایکسپو سنٹر لاہور میں میڈیا سے گفتگو کرتے ہوئے کہا کہ پاکستان ایک زرعی ملک ہے، زراعت کے شعبے سے اربوں ڈالر کی برآمدات سے اپنے وسائل میں اضافہ کیا جاسکتا ہے۔
انہوں نے کہا کہ پاکستان میں ہر شعبے میں بہت گنجائش ہے، پاکستان نے اگر آگے بڑھنا ہے تو برآمدات میں اضافہ کرنا پڑے گا، ہمیں ایسے چلنا ہے جیسے ارشد ندیم پاکستان کے پرچم کو بلند کرکے لوٹا ہے، ارشد ندیم سے ہمیں یہ سبق ملتا ہے کہ کام میں وسائل کی کمی کے باوجود بھی کامیابی حاصل کرسکتے ہیں۔ احسن اقبال کا کہنا تھا کہ اگر ارشد ندیم گولڈ میڈل جیت سکتا ہے تو وسائل سے مالا مال اس ملک کو ترقی کا گولڈ میڈل کیوں نہیں جتواسکتے، کل رات ارشد ندیم کے والد نے بتایا کہ میں نے رزق حلال سے اپنے بچوں کو پالا ہے۔ انہوں نے مزید کہا کہ یوم آزادی کا مہینہ ہے کہ ہمیں سوچنا ہے پاکستان کے ساتھ بہت کچھ ہوچکا، یہ جو دھرنے لانگ مارچ تھے فیصلے تھے عدالتوں کے فیصلوں نے ہمیں مشکل میں ڈالا ہے، پاکستان ترقی کی راہ پر گامزن تھا کہ چند ججوں اور جرنیلوں نے ایک اناڑی کو پاکستان پر مسلط کردیا۔
