لاہور (نمائندہ خصوصی) نامور اداکار ببرک شاہ نے کہا ہے کہ شوبز کو خیر باد نہیں کہا بلکہ حالات کے پیش نظر عارضی طو رپر کنارہ کشی اختیار کی ہے ،اس وقت فلمیں بن نہیں رہیںاور ٹی وی ڈرامہ انڈسٹری مکمل طو رپر کراچی منتقل ہو چکی ہے جبکہ اسٹیج ڈرامہ میرے مزاج سے مطابقت نہیں رکھتا۔
ایک انٹر ویو میں انہوں نے کہا کہ گھر کا چولہا جلانے کے لئے انسان کو کچھ نہ کچھ کرنا پڑتا ہے ، میں بھی اس وقت پراپرٹی کے پراجیکٹ میں مصروف ہوں ۔ا نہوں نے کہا کہ فلم اور ٹی وی ڈرامہ میرے دل کے بہت قریب ہے کیونکہ مجھے ان دونوں سے پہچان ملی ہے ، جب بھی اچھے پراجیکٹ کے لئے بلایا جائے گا میں ضرور کام کروں گا ۔
