لاہور(گلف آن لائن)کرکٹر عمر اکمل نے کہا ہے کہ ذاتی میٹنگز کے سلسلے میں امریکا جا رہا ہوں، اگر سب اچھا ہوتا ہے تو ہو سکتا ہے کہ میں کچھ عرصہ امریکا میں قیام کروں گا۔سماجی رابطے کی ویب سائٹ ٹوئٹر پر اپنے ایک پیغام میں کرکٹر عمر اکمل نے جہاز میں بیٹھے ہوئے اور بورڈنگ پاس کی تصاویر شیئر کرتے ہوئے بتایا کہ ذاتی میٹنگز کے سلسلے میں امریکا جا رہا ہوں۔عمر اکمل نے کہا کہ مجھے اپنے سپورٹرز کی دعائوں کی ضرورت ہے جیسے ہمیشہ کرتے رہے ہیں۔
ذرائع کے مطابق پابندی کے خاتمے کے بعد عمر اکمل کو رواں سیزن میں ڈومیسٹک کرکٹ کھیلنے کی اجازت ملی، وہ سنٹرل پنجاب سیکنڈ الیون کی جانب سے ٹی ٹوئنٹی کپ کھیلے لیکن ناکام رہے،جس کے بعد انہوں نے اچانک امریکا جانے کا فیصلہ کیا ہے۔ذرائع کا کہنا ہے کہ امکان ہے عمر اکمل امریکا میں کرکٹ کھیلنے کے لئے بات چیت کریں گے ،
انہیں انٹرنیشنل کرکٹ کے حوالے سے اپنا مستقبل اچھا نظر نہیں آ رہا، پی سی بی کی موجودہ مینجمنٹ کے ہوتے ہوئے ان کا کھیلنا انتہائی مشکل ہے۔واضح رہے کہ سمیع اسلم سمیت کئی کرکٹرز اس وقت امریکا میں کرکٹ کھیل رہے ہیں۔
