لاہور(گلف آن لائن) وزیر اعلی پنجاب عثمان بزدار نے کہا ہے کہ اپوزیشن تاش کے پتوں کی طرح بکھر رہی ہے، ان کے پاس کوئی تعمیری کام نہیں، اپوزیشن رہنماوں نے ہمیشہ عوامی ریلیف کی راہ میں روڑے اٹکائے، سانحہ مری میں ذمہ داروں کی غفلت کا تعین کیا، سانحہ مری کی شفاف تحقیقات کے وعدے کو پورا کیا۔
تفصیلات کے مطابق وزیراعلی پنجاب عثمان بزدار سے پاکستان تحریک انصاف نیویارک کے جنرل سیکرٹری خورشید بھلی نے ملاقات کی۔ اس موقع پروزیراعلی نے کہا کہ دیار غیر میں بسنے والے پاکستانی وطن عزیز کے سفیر ہیں، حکومت نے اپوزیشن کی مخالفت کے باوجود اوورسیز پاکستانیوں کو ووٹ کا حق دیا ہے، تحریک انصاف کی حکومت بیرون ملک مقیم پاکستانیوں کے مسائل سمجھتی ہے اور انہیں حل بھی کر رہی ہے، اپوزیشن نے ثابت کیا ہے کہ وہ وطن عزیز کے ان سفیروں کی خیرخواہ نہیں۔
عثمان بزدار کا کہنا تھا کہ اپوزیشن رہنماوں نے ہمیشہ عوامی ریلیف کی راہ میں روڑے اٹکائے، اپوزیشن کے منفی حربے ان کی منفی سیاست کیلئے زہر قاتل ثابت ہوئے ہیں، اپوزیشن منفی سیاست کرتی رہے لیکن ہم عوام کی خدمت پر گامزن رہیں گے۔ انہوں نے کہا کہ سانحہ مری میں ذمہ داروں کی غفلت کا تعین کیا اور ان کے خلاف ایکشن بھی لیا۔ سانحہ مری کی شفاف تحقیقات کے وعدے کو پورا کیا۔
