لاہور(گلف آن لائن)پاکستان سپر لیگ سیزن سیون کے پہلے کوالیفائر میچ میں ملتان سلطانزنے لاہورقلندرزکو28رنزسے شکست دے کرفائنل کے لئے کوالیفائی کرلیا، فخرزمان کی شاندارنصف سنچری رائیگاں چلی گئی،شاہ نواز دھانی میچ آف دی میچ قرار پائے۔پی ایس ایل سیزن سیون کے پہلے کوالیفائر میچ میں لاہور قلندرز نے ملتان سلطانز کے خلاف ٹاس جیت کر فیلڈنگ کا فیصلہ کیا۔ ملتان سلطانز نے پہلے بیٹنگ کرتے ہوئے مقررہ 20 اووروں میں 2 وکٹوں کے نقصان پر 163رنز بنائے۔ 164 رنزکے ہد ف کے حصول کے لئے بعدمیں بیٹنگ کرتے ہوئے لاہورقلندرز کی ٹیم مقررہ20اوورں میں 9وکٹوں کے نقصان پر135رنزبناسکی۔لاہور قلندر کی جانب سے اننگز کا آغاز فخر زمان اور عبداللہ شفیق نے کیا جبکہ ملتان سلطانز کی جانب سے پہلا اوور آصف آفریدی نے کیا۔
پہلی وکٹ17رنز پر گری جب عبداللہ شفیق5رنز بنا کر آصف آفریدی کی گیند پر ایل بی ڈبلیو آئوٹ ہوئے ۔ دوسری وکٹ 47رنزپرگری جب کامران گھمن 20رنزبناکرپویلین واپس لوٹ گئے ۔48رنز پر میدان بدر ہونے والے تیسرے کھلاڑی محمد حفیظ تھے جو ایک غلط شارٹ کھیلتے ہوئے بغیرکوئی رن بنائے خوشدل شاہ کی گیندپراسٹیمپڈآئوٹ ہوئے۔چوتھی وکٹ 102رنزپرگری جب ہیری بروک شاہ نوازدھانی کی گیندپر13رنزبناکرایل بی ڈبلیو آئوٹ ہوئے۔فخرزمان 45گیندوں پر4چھکوں اور2چوکوں کی مددسے63رنزبناکرڈیوڈ ویلی کی گیندپرایل بی ڈبلیوآئوٹ ہوئے ، اس وقت لاہور قلندرز کا مجموعہ 108رنزتھا۔چھٹی وکٹ109رنزپرگری جب فل سالٹ ایک رن بناکرشہ نوازدھانی کی گیندپرعامرعظمت کو کیچ دے بیٹھے ۔122رنزپر آئوٹ ہونے والے 7ویںکھلاڑی سمت پٹیل تھے جو 11رنزکے انفرادی سکور پر بناکرڈیوڈ ویلی کی گیندپرشاہ نواز دھانی کے ہاتھوں کیچ آئوٹ ہوئے۔
آٹھویں وکٹ124رنزپرگری جب شاہین شاہ آفریدی ایک سکوربناکرشاہ نواز دھانی کی گیندپربولڈ ہوکر پویلین لوٹے ۔126رنزپرڈیوڈ ویسا8رنزبناکررومان رئیس کی گیندپرایل بی ڈبلیوآئوٹ ہوئے جو لاہور قلندرز کا نواں نقصان تھا۔ ملتان کی جانب سے شاہ نوازدھانی نے3، ڈیوڈ ویلی نے2، آصف آفریدی، رمان رئیس اور خوشدل شاہ نے ایک ،ایک کھلاڑی کوآئوٹ کیا۔اس سے قبل ملتان سلطان نے پہلے بیٹنگ کرتے ہوئے مقررہ20اووروں میں 2وکٹوں کے نقصان پر163رنزبنائے۔ ملتان سلطانز کی جانب سے اننگز کاآغاز شان مسعود اور محمد رضوان نے کیا جبکہ پہلا اوور شاہین شاہ آفریدی نے کروایا۔ ملتان سلطانز کے اوپنرز نمایاں سکور کرنے میں ناکام رہے۔
ملتان کی پہلی وکٹ 3 رنز پر گری جب شان مسعود 2 رنز بناکر محمد حفیظ کی گیند پر ایل بی ڈبلیو آئوٹ ہوئے، دوسری وکٹ 50رنز پر گری جب عامر عظمت 22گیندوں پر 34رنز بناکر پٹیل کی گیند پر اسٹیپڈ آئوٹ ہوئے،اس کے بعد ویلی روسو اور محمد رضوان نے عمدہ بیٹنگ کرتے ہوئے تیسری وکٹ کی شراکت میں113رنز کا اضافہ کیا۔ محمد رضوان 51 گیندوں پر53رنز اور رئیلی روسو 42گیندوں پر65 رنز بنا کر ناٹ آئوٹ رہے۔ محمد حفیظ اور سمت پٹیل نے ایک ،ایک کھلاڑی کو آئوٹ کیا۔
