لاہور(گلف آن لائن)پاکستان کے خلاف تیسرے ٹیسٹ میچ میں آسٹریلیا کی پوری ٹیم پہلی اننگز میں 391 رنز بنا کر آئوٹ ہو گئی جبکہ پاکستان نے دوسرے روز کے اختتام پر ایک وکٹ کے نقصان پر 90 رنز بنا لیے۔لاہور کے قذافی اسٹیڈیم میں کھیلے جارہے سیریز کے تیسرے اور آخری ٹیسٹ میچ میں آسٹریلیا نے 232 رنز 5کھلاڑی آئوٹ سے اپنی پہلی اننگز دوبارہ شروع کی۔ دونوں کھلاڑیوں نے چھٹی وکٹ کے لیے 135 رنز کی پارٹنر شپ قائم کرکے آسٹریلیا کی پوزیشن مستحکم کردی جبکہ اس دوران دونوں نے نصف سنچریاں بھی مکمل کیں۔
پاکستان کو چھٹی وکٹ اس وقت ملی جب ایلکس کیری 65 رنز بنانے کے بعد نعمان علی کی گیند پر ایل بی ڈبلیو ہو گئے۔کیمرون گرین نے بھی 79 رنز کی اننگز کھیلی اورنسیم شاہ نے ان کی وکٹیں بکھیر کر تیسری وکٹ حاصل کی۔شاہین شاہ آفریدی نے 13 رنز بنانے والے مچل اسٹارک کو چلتا کردیا۔ نسیم نے بہترین بالنگ کا سلسلہ جاری رکھتے ہوئے نیتھن لائن کی اننگز کا بھی خاتمہ کردیا جبکہ شاہین کو لگاتار دو چھکے لگانے کے بعد مچل سویپسن بھی چلتے بنے۔ آسٹریلیا کی پوری ٹیم پہلی اننگز میں391 رنز بنا کر آئوٹ ہوگئی۔
پاکستان کی جانب سے نسیم شاہ اور شاہین نے 4، 4 وکٹیں حاصل کیں۔ پاکستان نے پہلی اننگز میں بیٹنگ کا آغاز کیا تو امام الحق 11 رنز بنا کر آسٹریلیا کے کپتان پیٹ کمنز کی گیند پر ایل بی ڈبلیو ہوئے ،امام الحق جب آئوٹ ہوئے تو پاکستان کا اسکور صرف 20 رنز تھا۔قذافی اسٹیڈیم لاہور میں جب دوسرے روز کے کھیل کا اختتام ہوا تو پاکستان نے 39 اوورز کے کھیل میں ایک وکٹ پر 90 رنز بنائے تھے اور کریز پر موجود دونوں بلے باز پراعتماد انداز میں بیٹنگ کر رہے تھے۔اوپنر عبداللہ شفیق 45 اور تجربہ کار بلے باز اظہر علی 30 رنز پر کھیل رہے ہیں۔
