کراچی (گلف آن لائن)وفاقی وزیر برائے خارجہ بلاول بھٹو زرداری کی جانب سے کراچی میں اپنے بھرپور استقبال پر عوام کا شکریہ ادا کیا گیا ہے۔پیپلز پارٹی کے چیئرمین بلاول بھٹو زرداری نے سماجی رابطے کی ویب سائٹ ٹوئٹر پر گزشتہ شب عوام کی جانب سے کیے گئے اپنے استقبال کی ڈرون ویڈیو شیئر کی ہے۔
بلاول بھٹو زرداری کا اپنی ٹوئٹ میں کہنا ہے کہ گزشتہ رات کراچی ایئرپورٹ پر ہمارے استقبال کے لیے بڑی تعداد میں آنے والے پاکستانی عوام کا مشکور ہوں۔انہوں نے لکھا کہ ہم جیت کر لوٹے ہیں، ہم ایک پر امن، خوشحال اور ترقی پسند پاکستان کی تعمیر کے لیے مل کر کام کریں گے۔
واضح رہے کہ پاکستان پیپلز پارٹی کے چیئرمین بلاول بھٹو زرداری وزیر خارجہ بننے کے بعد گزشتہ روز، اتوار کی شام پہلی مرتبہ کراچی پہنچے تو ان کا شاندار استقبال کیا گیا۔چیئرمین پیپلز پارٹی بلاول بھٹو زرداری اسلام آباد سے خصوصی طیارے میں کراچی پہنچے تھے۔
