کراچی (گلف آن لائن)پاکستان اور انگلینڈ کے درمیان ٹی ٹوئنٹی سیریز (آج) منگل20ستمبر سے کراچی میں شروع ہوگی ۔ شیڈول کے مطابق پاکستان اور انگلینڈ کے درمیان ٹی ٹوئنٹی سیریز کا پہلا میچ 20ستمبر کو کراچی کے نیشنل اسٹیڈیم میں کھیلا جائیگا ، میچ پاکستانی وقت کے مطابق شام ساڑھے سات بجے شروع ہوگا ۔ شیڈول کے مطابق دونوں ٹیموں کے درمیان دوسرا ٹی ٹوئٹنی میچ کراچی میں 20ستمبر کو کھیلا جائیگا اسی طرح تیسرا اور چوتھا میچ بھی بالترتیب 23اور 25ستمبر کو کراچی میں کھیلا جائیگا اور تمام میچ شام ساڑھے سات بجے شروع ہونگے ۔ دونوں ٹیموں کے درمیان پانچوں میچ 28ستمبر کو لاہور کے قذافی اسٹیڈیم میں کھیلاجائیگا ۔شیڈول کے مطابق چھٹا میچ 30ستمبر اور ساتوں میچ 2اکتوبر کو قذافی اسٹیڈیم میں کھیلا جائیگا دوسری جانب سیریز کے حوالے سے جوش و خروش عروج پر پہنچ چکا ہے، دونوں ہی سائیڈز ایک دوسرے کی صلاحیتیں آزمانے کو بے چین ہیں۔
دوسری جانب ایڈیشنل آئی جی کراچی جاوید عالم اوڈھو نے بتایا کہ انگلینڈ ٹیم کے لیے بہترین سیکیورٹی فراہم کی گئی ہے، سیکیورٹی پلان مناسب انداز سے بنایا گیا ہے۔جاوید عالم اوڈھو نے کہا کہ انگلش سیکیورٹی آفیشلز بھی ہماری پلاننگ سے خوش ہیں۔انہوں نے بتایا کہ میچز کے لیے 5 ہزار سیکیورٹی اہلکار تعینات کیے گئے ہیں، ہوٹل اور اسٹیڈیم کی سیکیورٹی پر عملدرآمد شروع ہو چکا ہے۔اے آئی جی پولیس نے کہا کہ تمام فورسز کے اہلکار منگل کو ہونے والی ریہرسل میں حصہ لیں گے، کراچی کے شہری اسٹیڈیم آئیں اور ایونٹ کو کامیاب بنائیں۔
