جو کہہ رہے ہیں وو خود نہیں گئے انکو منتظمین نے بزنس کلاس کا ٹکٹ نہیں دیا تھا’یاسر حسین

لاہور( گلف آن لائن)اداکار یاسر حسین نے اظفر رحمان کو ہم ایوارڈز میں شرکت نہ کرنے پر شدید تنقید کا نشانہ بنایاہے۔پاکستان کی تقریباً ساری ڈرامہ انڈسٹری گزشتہ ہفتے نجی ٹی وی چینل ہم کے ایوارڈ شو کی تقریب میں شرکت کے لئے کینیڈا میں موجود تھی لیکن اداکار اظفر رحمان اس میں شریک نہ ہوئے۔اظفر رحمان نے کہا تھا کہ وہ پاکستان میں سیلاب متاثرین کے ساتھ اظہار یکجہتی کے لیے کینیڈا ہم ایوارڈز 2022 میں شرکت نہیں کررہے جس پر سوشل میڈیا صارفین کی جانب سے انہیں بیحد سراہا گیا تھا۔

یاسر حسین نے سوشل میڈیا پر اظفر رحمان کا نام لئے بغیر کہا کہ لوگ بغیر کام کے نیویارک میں کافی پیتے ہوئے پھر رہے ہیں اور میں کام سے کینیڈا بھی نہیں جا سکتا۔اداکار نے مزید کہا کہ جو اداکار یہ کہہ رہے ہیں کہ وو خود نہیں گئے ان کو منتظمین کی جانب سے بزنس کلاس کا ٹکٹ ہی نہیں دیا گیا تھا۔یاسر حسین کی جانب سے اظفر رحمان پر تنقید پہلی مرتبہ نہیں کی گئی ، اس سے پہلے بھی ایک شو میں انہوں نے کہا تھا کہ اظفر رحمان کو لگتا ہے کہ وہ ایک بہترین اداکار ہیں لیکن وہ بالکل نہیں ہیں۔