کراچی (گلف آن لائن) معروف اداکارہ عائشہ عمر نے شعیب ملک سے تعلقات کی خبروں پر ردعمل دیتے ہوئے کہا ہے کہ وہ ایک شادی شدہ مرد سے تعلق کا سوچ بھی نہیں سکتیں۔ایک حالیہ انٹرویو میں شعیب ملک سے تعلقات کے حوالے سے سوال کیے جانے پر اداکارہ عائشہ عمر نے واضح کیا کہ ان کے درمیان کوئی غیر ضروری تعلقات نہیں۔اداکارہ نے کہا کہ شعیب ملک کے ساتھ میرا فوٹو شوٹ ایک سال پرانا تھا لیکن چند میڈیا ہاﺅسز نے ایک سال بعد ہائی لائٹ کیا جیسے وہ حالیہ فوٹوشوٹ ہو جس کے بعد وہ ایک پھر سوشل میڈیا پر گردش کرنے لگا۔
عائشہ عمر کا کہنا تھا کہ وہ ایک پروفیشنل فوٹوشوٹ تھا اور اگر وہ ایک شخص سے تعلق میں ہوتیں تو باقاعدہ فوٹوشوٹ کیوں کرواتیں اور اسے آن لائن پوسٹ کیوں کرتیں۔عائشہ کا کہنا تھا کہ وہ شادی شدہ لوگوں کے معاملات سے دور رہنا چاہتی ہیں اور کسی بھی شادی شدہ شخص سے تعلق کا سوچ بھی نہیں سکتیں۔یاد رہے کہ عائشہ عمر اور شعیب ملک کا بولڈ فوٹوشوٹ وائرل ہونے کے بعد سوشل میڈیا پر مداحوں اور صارفین کی جانب سے ان پر کڑی تنقید بھی کی گئی تھی۔
