کھڈیاں خاص(گلف آن لائن)بلال اشرف ”یونہی ”میں مایا علی کے مدمقابل ٹیلی ویژن پر ڈیبیو کریں گے۔ماہرہ خان کے مدمقابل کامیاب ترین پاکستانی فلم ”سپر اسٹار”میں اپنی شاندار اداکاری سے ناظرین کا دل جیتنے والے بلال اشرف باصلاحیت مایا علی کے مدمقابل ہم ٹی وی کے نئے ڈرامہ سیریل ”یونہی ” کے ذریعے ٹیلی ویژن کی دنیا میں قدم رکھ رہے ہیں ۔”’یونہی” ایک ہلکی پھلکی رومانوی سیریل ہے جس کے ہدایت کار محمد احتشام الدین ہیں۔ اس سیریل میں مایا علی اور بلال اشرف بالترتیب داود اور کنیز فاطمہ کے مرکزی کردار وں میں جلوہ گرہورہے ہیں۔
داود نہایت سادہ لوح جب کہ کنیز صاف گو مزاج کی مالک ہے۔دونوں ایک ہی ثقافتی پس منظر سے متعلق ہیںلیکن مختلف معاشروں میں پروان چڑھتے ہیں’ محبت کا رشتہ استوار ہونے کے بعد وہ زندگی کے بارے میں ایک دوسرے کے مختلف نقطہ نظر کو برداشت کرنا اور ان کا احترام کرنا سیکھتے ہیں۔یہ سیریل ان دونوں کرداروں کی زندگی کے مسائل اور معاشرے کی جانب سے دیئے گئے چیلنجوں کا احاطہ کرتے ہوئے ثقافتی اختلافات اور ان میں ضم ہونے کی کوششوں کو ہلکے پھلکے انداز میں پیش کرتا ہے ۔
ڈرامے کے نمایاں ستاروں میں بہروز سبزواری’ دیپک پروانی’ تزین حسین’طاہرہ امام’ منظور قریشی’ماہا حسن’ خاقان شاہنواز’ عظمیٰ بیگ’ سعد فریدی’ لائبہ خرم اور دیگر شامل ہیں ۔ مومنہ اور درید پروڈکشنز کے اس شاہکار کو ہر اتوار کی شب 8 بجے پیش کیا جائے گا۔
