کراچی(گلف آن لائن) بابراعظم کے بیٹ کی ضرب سے کئی ریکارڈز چکنا چور ہو گئے۔بابراعظم نے بدھ کے روز کوئٹہ گلیڈی ایٹرز کیخلاف پی ایس ایل کی اولین سنچری بنائی، پشاور زلمی کے کپتان نے 60 بالز کا سامنا کرتے ہوئے 15 چوکے اور 3 چھکے لگاکر یہ کارنامہ سرانجام دیا، انھوں نے 65 بالز پر 115 رنز بناکرپویلین کی راہ لی۔
اس عمدہ کاوش کی بدولت ٹیم نے 2 وکٹ پر 240 کا ریکارڈ مجموعہ ترتیب دے دیا، بابر نے ٹی 20 کرکٹ میں 36 ویں بار سنچری شراکت قائم کی، یہ کسی بھی پاکستانی بیٹر کی سب سے بہترین کارکردگی ہے۔رضوان 26 سنچری پارٹنر شپس میں شریک رہے ہیں، عالمی سطح پر اس معاملے میں کرس گیل(46)، ڈیوڈ وارنر(42) اور ویراٹ کوہلی(38) نمایاں ہیں۔ بابر 2019 کے بعد سے دنیا میں سب سے زیادہ 8 ٹی 20 سنچریاں بناکر نمایاں ترین ہوگئے۔
انگلش اسٹار جوز بٹلر 6 سنچریوں کے ساتھ ان کے بعد آتے ہیں، بابر اعظم اور صائم ایوب نے 162 رنز کی پی ایس ایل کی دوسری سب سے بڑی شراکت بنائی، ریکارڈ پارٹنر شپ کا اعزاز بابر اور شرجیل نے 176 رنز بناکر اپنے نام کیا تھا،انھوں نے یہ ریکارڈ 2021 میں کنگز کی نمائندگی کرتے ہوئے اسلام آباد یونائیٹڈ کیخلاف بنایا تھا۔
