مقبوضہ بیت المقدس (گلف آن لائن)اسرائیلی وزیر خارجہ ایلی کوہن نے مستقبل میں سعودی عرب کے دورے کا امکان ظاہر کرتے ہوئے کہا ہے کہ سعودی عرب کا دورہ ٹیبل پر ہے، ابھی تاریخ طے نہیں ہوئی۔اسرائیلی فوجی ریڈیو سے گفتگو میں ایلی کوہن نے کہا کہ امریکی سینیٹر لنزے گراہم کی سعودی ولی عہد شہزادہ محمد بن سلمان سے ملاقات میں سعودی اسرائیل تعلقات پر بات ہوئی تھی۔
اسرائیلی وزیرخارجہ نے کہا کہ سعودی عرب کا دشمن یقینی طور پر اسرائیل نہیں ایران ہے تاہم سعودی ایران تعلقات میں پیش رفت اسرائیل کے لیے خوش آئند ہو سکتی ہے۔ایلی کوہن نے کہا کہ سعودی ایران تعلقات، سعودی عرب کے اسرائیل کے قریب آنے کا باعث بن سکتے ہیں۔انہوں نے دعویٰ کیا کہ رواں برس ایک اور عرب ملک اسرائیل سے تعلقات کو معمول پر لائے گا۔رواں ہفتے اسرائیلی وزیراعظم بن یامین نتن یاہو نے بھی سعودی اسرائیل تعلقات کو عرب اسرائیل تنازع کے خاتمے کی طرف بڑا قدم قرار دیا تھا۔
