اسلام آباد (گلف آن لائن)وفاقی وزیر قانون اعظم نذیر تارڑ نے کہاہے کہ موجودہ حکومت محنت کشوں کے حقوق کے تحفظ کے لیے سرگرم ہے ، مزدوروں کا عالمی دن نہ صرف محنت کشوں کے تقدس اور وقار کی علامت ہے بلکہ یہ مزدوروں کی اہمیت کا اعتراف بھی ہے کیونکہ مزدور ملکی معاشی ترقی میں مرکزی حیثیت رکھتے ہیں۔
پیر کو یوم مئی پر اپنے پیغام میں وفاقی وزیر قانون نے کہا کہ مزدور پوری قوم کے معمار ہیں لہذا آج قوم مزدوروں کو خراج تحسین پیش کرتی ہے اور ملک کی ترقی میں ان کے کردار اور تعاون کو سراہتی ہے۔ انہوں نے کہا کہ اسلام نے سماجی انصاف، مساوات اور انسانی حقوق کے احترام کے اصولوں پر بھی زور دیا ہے۔اللہ تعالی اور خانم النبیین نبی اکرم صلی اللہ علیہ وسلم نے ہمیں مزدوروں کے قانونی اور بنیادی انسانی حقوق کو انتہائی اہمیت دینے کا حکم دیا ہے۔
انہوں نے کہاکہ اسلام مزدور کا پسینہ خشک ہونے سے پہلے اس کی اجرت ادا کرنے کا حکم دیتا ہے۔وفاقی وزیر نے کہا کہ موجودہ حکومت محنت کشوں کے کام کرنے اور رہنے کے معیار کو بہتر بنانے اور انہیں اور ان کے اہل خانہ کو ان کے حقوق اور فلاح و بہبود کے تحفظ کے ساتھ بہتر رہائش اور تعلیمی سہولیات فراہم کرنے کے لئے پرعزم ہے۔
لہذا موجودہ حکومت نے مزدوروں کی کم از کم اجرت میں بھی اضافہ کیا ہے۔آئیے آج ہم سب انفرادی اور اجتماعی طور پر مزدوروں کے حقوق کے لئے اپنا کردار ادا کرنے کا عہد کریں تاکہ مزدوروں کی سماجی، معاشی اور سماجی فلاح و بہبود میں سرمایہ کاری کرکے ان کی فلاح و بہبود کو یقینی بنایا جاسکے۔
