پیرس(گلف آن لائن) سعودی عرب میں سیر سپاٹے لائنل میسی کو مہنگے پڑگئے،فرنچ کلب پیرس سینٹ جرمین نے لائنل میسی کو دو ہفتوں کے لیے معطل کر دیا۔فرنچ میڈیا کے مطابق ٹیم ٹریننگ چھوڑ کر بغیر بتائے سعودی عرب جانے پر فرنچ فٹبال کلب پیرس سینٹ جرمین نے چمپئن فٹبالر لیونل میسی کو دو ہفتوں کے لیے معطل کیا۔فرنچ میڈیا کے مطابق میسی اور پی ایس جی کے درمیان 2سالہ تاریخی ڈیل ہوئی تھی، میسی اور پی ایس جی کے درمیان معاہدہ رواں گرمیوں کے سیزن میں ختم ہو رہا ہے،
لیونل میسی کو دو ہفتوں کے پیسے بھی نہیں دیئے جائیں گے، لیونل میسی پی ایس جی کے ساتھ معاہدہ ختم ہونے پر کلب کو چھوڑ سکتے ہیں۔غیر ملکی میڈیا کے مطابق سعودی فٹبال کلب آل ہلال نے لیونل میسی کو ایک سالہ معاہدے کی آفر کی ہوئی ہے، سعودی فٹبال کلب نے میسی کو 400 ملین پائونڈ کی آفر کی ہے۔سعودی وزیر سیاحت احمد الخطیب نے پیر کے روز میسی کی تصویروں کے ساتھ ٹویٹ کی تھی جس میں انہوں نے میسی کو خوش آمدید کہا تھا، میسی کے سعودی عرب جانے سے ایک دن پہلے پیرس سینیٹ جرمین کو فرنچ لیگ میں لورینٹ کے ہاتھوں ہوم گرانڈ پر تین ایک سے شکست ہوئی تھی۔
سعودی عرب نے لیونل میسی کو سیاحت کا سفیر بھی مقرر کر رکھا ہے، لیونل میسی پی ایس جی کی طرف سے 71بار ان ایکشن ہو چکے ہیں، 71میچوں میں میسی نے پی ایس جی کے لیے 31گول کیے اور 34بار گول اسیسٹ کیا۔میسی اور فرنچ فٹبال کلب پی ایس جی کے درمیان 2021ء میں معاہدہ ہوا تھا، دو سالہ معاہدے کے مطابق فرنچ کلب لیونل میسی کو سالانہ 41ملین ڈالر صرف تنخواہ کی مد میں دیتا ہے، 41ملین ڈالر سالانہ تنخواہ میں بونس شامل نہیں ہیں۔
