اسلام آباد(گلف آن لائن)استحکام پاکستان پارٹی کے صدر علیم خان نے کہا ہے کہ عثمان بزدار کو اس وقت جیل میں ہونا چاہیے، ان سے پولیس یا ادارے تفتیش کریں تو وہ ساری باتیں خود بتا دیں گے۔نجی ٹی وی سے گفتگو کرتے ہوئے علیم خان نے کہاکہ وہ جو باتیں کر رہے ہیں وہ پی ٹی آئی میں بھی سب کو معلوم ہیں۔
استحکام پاکستان پارٹی کے رہنما نے کہا کہ چاہیں تو شاہ محمود،شیریں مزاری اور اسد عمر سے قرآن اٹھوا کر پوچھ لیں کہ علیم خان جو کہہ رہا ہے وہ جھوٹ ہے یا سچ ہے۔علیم خان نے کہاکہ پرویز خٹک کو تو سب سے پہلے استحکام پاکستان پارٹی میں شامل ہونا چاہیے۔انہوں نے کہا کہ ان کی پارٹی کا منشور پی ٹی آئی والا ہوگا کیونکہ وہ منشور سب نے مل کر بنایا تھا۔
علیم خان نے کہاکہ ان کی پارٹی الگ الیکشن لڑے گی،کسی کے ساتھ اتحاد نہیں کریں گے،سیٹ ایڈجسٹمنٹ کا فیصلہ مقامی سطح پر حلقے کی سیاست کرنے والے رہنما کریں گے۔واضح رہے کہ چند روز قبل پنجاب میں مبینہ طور پر رشوت لے کر تعیناتیاں اور تقرریاں کرنے کے الزام میں سابق وزیراعلیٰ عثمان بزدار سمیت 8اہم شخصیات کے خلاف اینٹی کرپشن میں مقدمہ درج کیا تھا جبکہ ان کے خلاف قومی احتساب بیورو (نیب)لاہور میں آمدن سے زائد اثاثہ جات کی انکوائری بھی چل رہی ہے۔
سابق وزیراعلیٰ پنجاب عثمان بزدار9مئی واقعات کے بعد سیاست سے دستبرداری کا اعلان کر چکے ہیں، ان کا کہنا تھا کہ 14ماہ سے مختلف عدالتوں میں مقدمات کا سامنا کررہا ہوں۔
