لاہور (گلف آن لائن) پاکستان کرکٹ بورڈ نے آئرلینڈ اور انگلینڈ کے خلاف رواں ماہ ہونے والی ٹی ٹونٹی سیریز کے لیے اپنے 18رکنی اسکواڈ کا اعلان کردیا ۔
آئرلینڈ کے خلاف سیریز 10 سے 14مئی تک ہے جبکہ انگلینڈ کے خلاف سیریز 22سے 30مئی تک کھیلی جائے گی۔واضح رہے کہ آئی سی سی مینز ٹی ٹونٹی ورلڈ کپ کے لیے پاکستان کرکٹ ٹیم کا اعلان 22مئی کو لیڈز میں پہلے ٹی ٹونٹی انٹرنیشنل کے بعد کیا جائے گا اور اسکواڈ کو 18سے 15 رکنی کردیا جائے گا۔
آئی سی سی مینز ٹی ٹوئنٹی ورلڈ کپ کے لیے ٹیموں کے اعلان کی آخری تاریخ 24 مئی ہے۔مینز سلیکشن کمیٹی نے فاسٹ بولر حارث رئوف کے ساتھ ساتھ آل رائونڈر حسن علی اور سلمان علی آغا کو 18رکنی اسکواڈ میں دوبارہ شامل کیا ہے۔ نیوزی لینڈ کے خلاف حالیہ ہوم سیریز کے 17کھلاڑیوں کے اسکواڈ میں سے جو دو کھلاڑی اس اٹھارہ رکنی ٹیم میں جگہ نہیں بناپائے ہیں وہ اسپنر اسامہ میر اور فاسٹ بولر زمان خان ہیں۔
آئرلینڈ اور انگلینڈ کے لیے پاکستانی اسکواڈ میں بابر اعظم (کپتان)، ابرار احمد، اعظم خان، فخر زمان، حارث رئوف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، محمد عرفان خان، نسیم شاہ، صائم ایوب، سلمان علی آغا، شاداب خان، شاہین شاہ آفریدی اور عثمان خان شامل ہیں ۔ یاد رہے کہ حارث رئوف اور وکٹ کیپر بیٹر اعظم خان انجری کی وجہ سے نیوزی لینڈ کے خلاف ٹی ٹونٹی سیریز میں حصہ نہیں لے پائے تھے جب کہ مڈل آرڈر بیٹر محمد عرفان خان اور وکٹ کیپر بیٹر محمد رضوان کو نگل کی وجہ سے لاہور میں ہونے والے دونوں ٹی ٹونٹی میچوں میں آرام دیا گیا تھا۔
ان چاروں کرکٹرز کی فٹنس کا جائزہ منگل کی سہ پہر نیشنل کرکٹ اکیڈمی میں لیا گیا جس میں نمایاں بہتری دکھائی دی ہے۔ اسی پیش رفت سے پی سی بی میڈیکل پینل اور ٹیم مینجمنٹ کو یہ اعتماد اور حوصلہ ملا کہ ان کرکٹرز کو سات ٹی ٹونٹی میچوں کے لیے اسکواڈ میں شامل کرلیا جائے۔سلمان علی آغا نے خود کو ایک ورسٹائل کرکٹر کے طور پر ثابت کیا ہے۔ وہ جارحانہ مڈل آرڈر بیٹنگ اور آف اسپن بولنگ میں ماہر ہیں۔
ان کی شمولیت سے ابرار احمد، افتخار احمد، عماد وسیم اور شاداب خان کے ساتھ پاکستان کے اسپن بولنگ کے شعبے کو تقویت ملتی ہے۔حسن علی کا انتخاب ان کے وسیع تجربے سے تعلق رکھتا ہے وہ 50ٹی ٹونٹی انٹرنیشنل کھیل چکے ہیں اور دو طرفہ سیریز اور آئی سی سی ایونٹس میں عمدہ کارکردگی کا مظاہرہ کرچکے ہیں۔ ایچ بی ایل پاکستان سپر لیگ 2024میں انہوں نے 14وکٹیں حاصل کیں۔ ان دنوں وہ انگلش کائونٹی چمپئن شپ میں وارکشائر کی نمائندگی کر رہے ہیں۔
قومی سلیکشن کمیٹی کا کہنا ہے کہ اس اسکواڈ کو تیار کرنا ایک مشکل کام تھا جس کا سبب غیرمعمولی ٹیلنٹ کا دستیاب ہونا ہے۔ مکمل غور و خوض اور کرکٹ کے مختلف پہلوں پر غور کرنے کے بعد ہم نے ان 18کھلاڑیوں کو حتمی شکل دی ہے۔ اسکواڈ میں بابر اعظم، فخر زمان، محمد رضوان، صائم ایوب اور عثمان خان کی شکل میں ایک مضبوط ٹاپ آرڈر موجود ہے۔ اعظم خان، افتخار احمد اور محمد عرفان خان کے ساتھ ایک موثر مڈل آرڈر موجود ہے جبکہ عماد وسیم، شاداب خان اور سلمان علی آغا ورسٹائل آل رائونڈرز ہیں ۔
پیس بیٹری محمد عباس آفریدی، محمد عامر، نسیم شاہ، حارث رف، حسن علی اور شاہین شاہ آفریدی پر مشتمل ہے اور ابرار احمد کی اسپن صلاحیت بھی اسکواڈ کا حصہ ہے۔سلیکشن کمیٹی کا کہنا ہے کہ ہم سمجھتے ہیں کہ اسامہ اور زمان مایوس ہوں گے اور انہیں ایسا ہی ہونا چاہیے جیسا کہ وہ آئرلینڈ اور انگلینڈ کے دوروں کے منتظر ہوں گے۔ وہ معیاری کرکٹرز ہیں اور ان کے آگے طویل کریئر ہے۔ انہیں اپنی کرکٹ پر توجہ مرکوز رکھنے کی ضرورت ہے تاکہ ضرورت پڑنے پر وہ دستیاب ہوں۔ٹیم لاہور میں 4 سے 6مئی تک تین روزہ تربیتی کیمپ کے بعد 7مئی کو ڈبلن کے لیے روانہ ہوگی۔
شیڈول کے مطابق آئرلینڈ کے خلاف پہلا ٹی ٹونٹی انٹرنیشنل 10مئی کو ڈبلن ، دوسرا ٹی ٹونٹی انٹرنیشنل 12مئی کو ڈبلن اور تیسرا ٹی ٹونٹی انٹرنیشنل 14مئی جو ڈبلن میں کھیلا جائے گا ۔ جبکہ انگلینڈ کے خلاف پہلا ٹی ٹونٹی انٹرنیشنل22مئی کو لیڈز، دوسرا ٹی ٹونٹی انٹرنیشنل 25مئی کو برمنگھم ، تیسرا ٹی ٹونٹی انٹرنیشنل 28مئی کو کارڈف اور چوتھا ٹی ٹونٹی انٹرنیشنل 30مئی کو اوول میں کھیلا جائے گا ۔
