حیدرآباد(نمائندہ خصوصی) بھارتی ریاست تلنگانہ میں کانگریس سے تعلق رکھنے والے ایک ایم ایل اے نے مرکزی وزیر رونیت سنگھ بٹو کا سر قلم کرنے والے شخص کے لیے اپنی زمین بہ طور انعام دینے کا اعلان کر دیا ہے۔بھارتی میڈیا رپورٹس کے مطابق مرکزی وزیر رونیت سنگھ بٹو نے کانگریس کے رہنما اور اسمبلی میں اپوزیشن لیڈر راہول گاندھی کو نمبر ون دہشت گرد قرار دیا تھا، جس پرتلنگانہ کانگریس کے رکن اسمبلی ویدما بجو نے اعلان کیا ہے کہ جو شخص بٹو کا سر کاٹے گا، وہ اسے اپنی 1.38 ایکڑ اراضی دے دیں گے۔
کانگریس کے ایم ایل نے رونیت سنگھ بٹو سے مطالبہ کیا کہ وہ راہول گاندھی سے متعلق اپنے الفاظ واپس لیں، ورنہ وہ ان کا سر کاٹنے والے کو اپنی زمین بہ طور انعام منتقل کریں گے۔نریندر مودی کی پارٹی بی جے پی نے ویدما بجو کے اعلان کی مذمت کرتے ہوئے کہا کہ تلنگانہ میں راہول گاندھی کی نام نہاد محبت کی دکان میں خطرناک اور مجرمانہ اشتعال انگیزی پریشان کن حد تک معمول کی بات بن گئی ہے۔
