اسلام آباد (نمائندہ خصوصی)چیئرمین پیپلزپارٹی بلاول بھٹو نے کہا ہے کہ اتفاق رائے تقریبا ہوچکا ہے، اپنی سیاسی قوت سے آئینی ترمیم کرکے دکھائیں گے، کوشش ہے جلد از جلد اتفاق رائے سے آئینی ترمیم منظور کرالیں۔پاکستان پیپلزپارٹی کی مشترکہ پارلیمانی پارٹی کے اجلاس سے خطاب کرتے ہوئے چیئرمین پیپلز پارٹی بلاول بھٹو نے کہاکہ ہماری کوشش ہے کہ سیاسی اتفاق رائے سے 26ویں آئینی ترمیم منظور کرکے میثاق جمہوریت میں عوام سے کئے گئے وعدوں کو پورا کریں۔انہوں نے کہاکہ خورشید شاہ نے گزشتہ روز ارکان پارلیمنٹ کی شکایات کا نوٹس لیتے ہوئے سپیکر کو ان شکایات سے آگاہ کیا ہے۔ انہوں نے کہاکہ پیپلزپارٹی، مسلم لیگ (ن)اور جے یو آئی (ف)میں اتفاق رائے کے اعلان کے بعد اس قسم کی شکایات کا سامنے آنا افسوسناک اور قابل مذمت ہے، ہم امید کرتے ہیں کہ خورشید شاہ کی سربراہی میں کام کرنیوالی کمیٹی ان شکایات کا ازالہ کرے گی تاکہ آئندہ یہ شکایات سامنے نہ آئیں۔
انہوں نے کہاکہ جب ہم آئین سازی کی طرف بڑھ رہے ہیں اور اتفاق رائے تقریبا ہوچکا ہے، عدالتی اصلاحات پر پیپلزپارٹی ،جے یوآئی اور مسلم لیگ متفق ہیں ، ہم انشااللہ اپنی سیاسی طاقت سے آئینی ترمیم منظور کرکے دکھائیں گے۔انہوں نے کہاکہ میں پارلیمانی پارٹی کے اجلاس کے بعد مولانا فضل الرحمن سے ملوں گا، مولانا فضل الرحمن کے جائز مطالبات اور شکایات گزشتہ رات وزیر اعظم کے سامنے رکھی ہیں، امید کرتا ہوں کہ وزیراعظم نے کل جو یقین دہانی کرائی تھی آج اس پر عمل کریں گے، اگر ایسا ہوا تو ہم آئینی ترمیم کو منظور کرانے کے قابل ہوں گے۔
چیئرمین پیپلزپارٹی بلاول بھٹو نے اپنی پارلیمانی پارٹی کو واضح ہدایت دی کہ اگر پارٹی کا کوئی رکن یا موجود نہیں ہے یا اسے میری تحریری ہدایات نہیں ملیں تو آپ میرے ان لفاظ کو واضح ہدایت سمجھیں کہ پیپلزپارٹی کے ارکان آئینی ترمیم پر اسی رائے کے حق میں ووٹ ڈالیں گے جس پر میں ووٹ دوں گا۔انہوں نے کہاکہ اگر میں حکومت کی کسی شق یا تجویز کے حق میں ووٹ نہیں دیتا تو آپ کو ہدایت کی جاتی ہے کہ آپ بھی ایسی کسی تجویز یا شق کے حق میں ووٹ نہیں دیں گے اور اپنے پارلیمانی لیڈر کی ہدایات پر عمل کریں گے۔
٭٭٭٭٭
