اسلام آباد(نمائندہ خصوصی )چیف جسٹس پاکستان یحیی آفریدی کی طرف سے سے طلب کیا گیا فل کورٹ اجلاس کل ( پیر کو) دن ایک بجے منعقد ہوا۔ چیف جسٹس نے فل کورٹ کے ساتھ انسداد دہشت گردی کی عدالتوں کے انتظامی ججز اجلاس بھی 7 نومبر کو طلب کرلیا ہے جس میں عمل درآمد رپورٹس ساتھ لانے کی ہدایت کی ہے۔جاری اعلامیے کے مطابق فل کورٹ اور انسداد دہشت گردی کی عدالتوں کے انتظامی ججز کے ساتھ اجلاس سپریم کورٹ اسلام آباد میں ہوگا ۔
اس کے علاوہ چیف جسٹس پاکستان نے سپریم جوڈیشل کونسل کا اجلاس بھی 8 نومبر کو طلب کرلیا۔ دریں اثناء سپریم کورٹ کی جانب سے آج 28 اکتوبر سے یکم نومبر تک کا ججز روسٹر جاری کیا گیا ہے جس کے مطابق سپریم کورٹ کے 8 بنچز رواں ہفتے مقدمات کی سماعت کریں گے، بینچ نمبر 1 چیف جسٹس پاکستان یحیی آفریدی اور جسٹس شاہد بلال پر مشتمل ہوگا جبکہ بینچ دو میں جسٹس منیب اختر اور جسٹس اطہر من اللہ شامل ہونگے۔
بینچ تین جسٹس امین الدین خان اور جسٹس عرفان سعادت خان پر مشتمل ہوگا، اسی طرح 4 نمبر بینچ میں جسٹس جمال مندو خیل، جسٹس مسرت ہلالی اور جسٹس ملک شہزاد شامل ہیں۔بینچ پانچ جسٹس محمد علی مظہر اور جسٹس حسن اظہر رضوی، بینچ چھ میں جسٹس عائشہ اے ملک اور جسٹس عقیل عباسی، بینچ سات جسٹس شاہد وحید اور جسٹس نعیم اختر افغان پر مشتمل ہوگا جبکہ بینچ آٹھ جسٹس سردار طارق مسعود اور جسٹس مظہر عالم میاں خیل پر مشتمل ہوگا۔
