لاہور(نمائندہ خصوصی)ہیڈ کوچ پاکستان ہاکی ٹیم طاہر زمان کا کہنا ہے کہ ورلڈکپ 2026 کے لیے کوالیفائی کرنا ٹارگٹ ہے، اس کے لیے ہماری نظریں نومبر 2025 میں ہونے والے ایشیا کپ پر ہیں۔طاہر زمان نے لاہور میں گفتگو کرتے ہو ئے کہا کہ اس وقت چین میں ہونے والے ایک ایونٹ میں ٹیم بھیجنے کا پلان ہے، چین کا ایک ٹاپ لیول ڈومیسٹک ٹورنامنٹ 11 سے 22 نومبر تک ہو رہا ہے، اس میں پی ایچ ایف ڈویلپمنٹ ٹیم بھیج رہے ہیں۔
ہیڈ کوچ پاکستان ہاکی ٹیم کا کہنا تھا کہ ہماری کوشش ہے کہ ایک شارٹ کیمپ لگا کر پی ایچ ایف ڈویلپمنٹ ٹیم بنائیں، ٹیم کو 9 تاریخ تک چین بھجوانے کے لیے تمام تر تیاریاں مکمل کرنیکی کوشش کر رہے ہیں۔طاہر زمان نے کہا کہ فنڈز کے بغیر کوئی کام نہیں ہوسکتا، ہائی پرفارمنس پروگرام کو شروع کرنے کیلئے فنڈز کی ضرورت ہے، ہائی پرفارمنس پروگرام نہیں ہوتا تو ورلڈکپ کی کوالیفکیشن کے لیے درست انداز میں تیاری نہیں ہو سکتی ، ہمارا ایک سال میں 25 میچز یورپ میں کھیلنے کا پلان ہے، حکومت سے درخواست ہے فنڈز دے، پرائیویٹ سیکٹر سے ہم خود کوشش کر رہے ہیں۔ہیڈ کوچ نے مزیدکہا کہ کھلاڑیوں کا ایک پول تیار کر رہے ہیں تاکہ ان کے آف سیزن میں کیمپ لگائیں، کیمپ میں اسکلز کو بہتر بنانے کی کوشش کی جائیگی تاکہ ورلڈکپ کوالیفکیشن کے لیے اچھی تیاری کی جاسکے۔
