واشنگٹن (نمائندہ خصوصی )امریکی صدر جوبائیڈن نے دوسری بار صدر منتخب ہونے پر ڈونلڈ ٹرمپ کو مبارکباد دی اور انہیں ملاقات کے لیے وائٹ ہاﺅس آنے کی دعوت دے دی۔ امریکی خبررساں ادارے کے مطابق وائٹ ہاﺅس سے جاری بیان میں کہا گیا ہے کہ امریکی صدر جوبائیڈن نے ری پبلکن پارٹی کے امیدوار ڈونلڈ ٹرمپ کو فون کرکے صدارتی انتخابات میں جیت پر مبارک باد دی۔ترجمان وائٹ ہاﺅس کے مطابق جوبائیڈن نے ڈونلڈ ٹرمپ سے ٹیلی فونک گفتگو کے دوران اقتدار کی منتقلی کویقینی بنانے کا عہد کیا اور نو منتخب صدر کو وائٹ ہاﺅس آنے کی دعوت دی۔
بیان میں کہا گیا کہ امریکی صدر جو بائیڈن نے ڈیموکریٹ امیدوار و نائب صدر کاملا ہیرس سے ملاقات کی اور ملک کو اکٹھا کرنے کے لیے کام کرنے پر زور دیا۔ رپورٹ کے مطابق امریکی صدر نے 4 سال قبل وائٹ ہاﺅس سے نکالے جانے والے شخص کو اوول آفس میں ملاقات کے لیے بلایا ہے تاکہ انہیں آفس کی چاپیاں دوبارہ دینے کی تیاری کی جاسکے۔
ڈونلڈ ٹرمپ کی انتخابی مہم کے کمیونیکیشن ڈائریکٹر اسٹیون چیونگ نے کہا کہ ڈونلڈ ٹرمپ نے جوبائیڈن کے اقدام کو سراہا ہے اور وہ جلد ہونے والی اس ملاقات کے منتظر ہیں۔وائٹ ہاﺅس کے ایک عہدیدار نے بتایا کہ بائیڈن کے چیف آف اسٹاف نے صدارتی منتقلی کو منظم طریقے سے شروع کرنے کے لیے ٹرمپ کی ٹیم پر ضروری وفاقی معاہدوں پر دستخط کرنے پر زور دیا۔
