لاہور (گلف آن لائن) پاکستان مسلم لیگ (ن) کی مرکزی سیکرٹری اطلاعات مریم اورنگزیب نے کہاہے کہ یہ حکومت نواز شریف اور شہباز شریف کے بنائے ہوئے موٹر ویز ہی آباد نہیں کر سکی ، کچھ لوگ چلتی مشینوں کے پرزے کھول دیتے ہیں ، موجودہ حکمرانوںنے ایسا ہی چلتے پاکستان کے ساتھ کیا ہے،عوام کو خوشخبری دینا چاہتی ہوں ان کے دن گنے جا چکے ہیں،اس حکومت کے ترجمان صبح و شام ٹیں ٹیں کرتے رہتے ہیں لیکن کوئی کارکردگی نہیں.
شہباز شریف کو ان کی حراست میں 100 دن مکمل ہو گئے لیکن یہ ان پر 100 پیسے کی کرپشن ثابت نہیں کر سکے ،شہباز شریف نے جنوبی پنجاب سمیت پورے پنجاب میں جو انفراسٹرکچر دیا وہ کوئی اور حکمران نہیں دے سکا ۔ احتساب عدالت میں میڈیا سے گفتگو کرتے ہوئے انہوں نے کہاکہ موجودہ حکمران ملک کی خدمت کرنے والوں کو اور ان کی آوازوں کو بند کر کے ملک پر مسلط ہوئے ہوئے ہیں ،نالائق، نااہل، چور اور کرپٹ حکمرانوں کے دور میں 400 ارب کی چینی، 225 ارب کا آٹا، 122 ارب کا ایل این جی پر ڈاکہ ڈلتا ہے لیکن کوئی پوچھنے والا نہیں .
نیب نے سرکاری خزانے کو 7 ارب روپے کا نقصان پہنچایا ہے۔ انہوں نے کہاکہ نیب چیئرمین پرویز مشرف کیخلاف مقدمہ قائم کریں ،نیب نیازی گٹھ جوڑ کا مقصد سیاسی انتقام ہے ۔ا نہوںنے کہاکہ عوام کی جیبوں پر ڈاکہ ڈال کر یہ ایمنسٹی اسکیم کا اعلان کر دیتے ہیں ،پھر کہتے ہیں کہ ہماری تیاری نہیں ہے ،ان کے دور میں پاکستان کرکٹ ٹیم ٹی ٹونٹی میں پہلے سے آٹھویں نمبر پر پہنچ گئی ہے، یہ آج کرپشن، آٹا و چینی چوری، ایل این جی کے کپتان ہیں۔
انہوںنے کہاکہ آج ملک کا ہر طبقہ دوہائیاں دینے پر مجبور ہے، کہتے ہیں ہم گھر بنائیں گے، قرضے ملیں گے، منصوبے دیںگے لیکن پھر کہتے ہیں ابھی ہماری تیاری نہیں ہے ،جس چیز کی ان کی تیاری ہے اس کا حال دیکھ لیں،پاکستان کرکٹ ٹیم ٹی ٹونٹی کے پہلے نمبر سے 8 ویں نمبر پر آگئی ہے،پاکستان کی کرکٹ ٹیم ڈھائی سال سے کوئی میچ ہی نہیں جیتی۔انہوںنے کہاکہ مانا کہ آپ کی تیاری ملک، معیشت چلانے اور نوکریاں دینے کی نہیں تھی لیکن جس کی تیاری اور مہارت تھی اسکا کیا حال کردیا ہے.
