اسلام آباد (نمائندہ خصوصی) مسلم لیگ ق کے صدر سابق وزیراعظم چوہدری شجاعت حسین کے بھائی سابق وفاقی وزیر چوہدری وجاہت حسین کی طرف سے چوہدری شجاعت حسین کے بیٹے پر سابق صدر آصف علی زرداری سے ڈالر لینے کے بیان کا جو تنازعہ پیدا ہوا ہے وہ ایک نیا رخ اختیار کر گیا ہے ۔ ملک کے معروف بزنس مین میاں محمد منشاء نے چند سال قبل چوہدری شجاعت حسین کے صاحبزادے چوہدری شافع حسین سے لین دین کے کروڑوں روپوں کا تنازعہ چل رہا ہے اور شافع حسین نے آصف زرداری سے یہ کہا تھا کہ میاں منشاء سے میرے پیسے دلوا دیں جس پر آصف زرداری نے انہیں یقین دلایا تھا میں کوشش کروں گا لیکن تم نہ یہ پیسے پاکستانی کرنسی میں نہیں بلکہ ڈالرز میں ڈیمانڈ کرنے ہیں تاکہ موجودہ ریٹس کے مطابق پیسے ملیں ۔
ذرائع کے مطابق وزیراعلی پنجاب کے انتخاب کے معاملے پر جب آصف زرداری لاہور میں چوہدری شجاعت حسین سے ملاقات کرنے آئیں تو اس موقع پر چوہدری شافع حسین نے آصف زرداری کو مخاطب کرتے ہوئے کہا کہ انکل آپ نے تو اپنے پیسے میاں منشاء سے وصول کر لئے تھے میں نے بھی انہیں ایک فیکٹری بیچی تھی جس کی ابھی تک انہوں نے مکمل ادائیگی نہیں کی آپ میرے پیسے بھی میاں منشاء سے دلوا دیں جس پر آصف زداری نے مسکراتے ہوئے کہا بیٹا تم فکر نہ کرو میں پوری کوشش کروں گا لیکن میرا مشورہ ہو گا کہ یہ رقم پاکستانی کرنسی کے بجائے موجودہ ڈالر ریٹ پر وصول کرنا جب اس بات کی اطلاع چوہدری وجاہت حسین کو ملی تو انہوں نے گجرات میں اپنے حامیوں کے ایک اجتماع سے خطاب کرتے ہوئے الزام عائد کیا تھا کہ چوہدری ظہور الہی مرحوم کے پوتے نے آصف زرداری سے ڈالر مانگ ہیں جس پر چوہدری شجاعت حسین نے سخت ناراضگی کا اظہار کیا تھا تاہم عید سے ایک روز قبل چوہدری وجاہت حسین نے اپنے بڑے بھائی سے ملاقات کر کے اپنے بیان کی وضاحت کر دی تھی تاہم ان سے یہ مطالبہ کیا گیا کہ وہ پبلک میں اپنے بیان کی ترید کریں جس پر چوہدری وجاہت حسین نے انکار کر دیا تھا۔
٭٭٭٭٭
