لاہور(گلف آن لائن)سابق وزیر خزانہ شوکت ترین نے کہا ہے کہ پی ٹی آئی حکومت نے آئی ایم ایف سے اپنی شرائط پر معاہدے کیے تھے،موجودہ حکومت کو چاہیے کہ آئی ایم ایف کو ملکی مشکلات بتا کر بات کرے لیکن حکومت میں اعتماد کا فقدان ہے ،وزیر خزانہ مفتاح اسماعیل فیصلے نہیں کرپارہے ہیں۔
ایک انٹر ویو میں انہوںنے کہا کہ موجودہ حکومت کو ہوم ورک کرکے حکمت عملی اپنانی چاہیے لیکن جب 13 جماعتوں کے اتحاد کی حکومت ہوگی تو ایسے مسائل تو آئیں گے۔انہوںنے کہا کہ صوبوں نے وفاق سے معاہدے کررکھے ہیں ،وفاق نے 2 ماہ تک صوبائی حکومت کو جواب نہیں دیا تو اس کا ذمہ دارکون ہے؟ ۔
ایک سوال کے جواب میں انہوں نے کہا کہ سیلاب سے ملک بھرمیں بہت زیادہ نقصانات ہوئے ہیں ،اس وقت الزام تراشی میں نہیں پڑنا چاہیے عوام کو ریلیف فراہم کرنا چاہیے ،حکومت سیلاب سے پہلے حکمت عملی بنالیتی تو اس صورت حال کا سامنا نہ ہوتا۔انہوں نے کہا کہ یہ حکومت عوام کو کیا ریلیف دے گی ابھی تو مزید مہنگائی کا طوفان آئے گا ابھی تو حکومت پٹرولیم لیوی میں مزید اضافہ کرے گی۔ملک میں مہنگائی کی شرح 43 فیصد ہوچکی ہے جبکہ ماہرین کا کہنا ہے کہ یہ شرح 50 فیصد سے اوپر جائے گی اور سیلاب کی وجہ سے مہنگائی مزید بڑھے گی۔
