لاہور (نمائندہ خصوصی) وفاقی وزیر ہوا بازی و و سینئر رہنمامسلم لیگ ن خواجہ سعد رفیق نے کہا ہے کہ عمران خان کو لانے والے بھی جانتے تھے یہ اہل نہیں ہے، اب عمران خان پھراسٹیبلشمنٹ سے منتیں کررہے ہیں کہ مجھے لا اور تخت پربیٹھا دو، خواجہ رفیق شہید کے 50ویں یوم شہادت پر منعقدہ سیمینار سے خطاب کرتے ہوئے انہوں نے کہا کہ 22کروڑ کے ملک کو تماشا بنایا ہوا ہے،
عمران خان پاکستان کو دیوالیہ پن کے کنارے پر چھوڑ گیا تھا ، الیکشن کے ذریعے قیادتوں کے فیصلے کیے جائیں، ملک و قوم کا فیصلہ ہم نے کرنا تھا جو عوام کے درمیان رہتے تھے لیکن فیصلے کہیں اور ہو رہے تھے، جنہوں نے ملک کو بنایا اور سنوارا انہیں غدار بنا کر پیش کیا گیا، ہمیں چور بناکر پیش کیا گیا، کیا ملک کے لیے قربانیاں دینے والے ملک سے غداری کا سوچ بھی سکتے ہیں؟
سعد رفیق نے کہا کہ بڑی خوش بختی ہے کہ ایک اتحادی حکومت بنی ہے، اب سیاست دانوں پر ذمہ داری 100فیصد پڑ گئی ہے ، اگلوں نے ثابت کردیا ہے ہم غیر سیاسی ہیں، خان صاحب جمہوریت اور سیاست کی ریڈ لائن کراس نہ کریں، خان صاحب آنا آپ نے ہمارے پاس ہی ہے لیکن آئیں گے آپ ٹکریں کھا کر،انہوں نے کہا عمران خان صاحب آپ کہتے ہیں کسی کی عیب جوئی نہیں کرنی چاہیے،آپ کو اب یاد آیا ہے، بیٹی کو باپ کے سامنے پکڑتے تھے،اب کہتے ہیں قمر جاوید باجوہ اکیلا ذمہ دار تھا، نوازشریف کو سازش کے تحت نااہل کیا گیا۔
