اسلام آباد (گلف آن لائن)چیئرمین پی ٹی آئی عمران خان نے کہاہے کہ نواز شریف واپسی کیلئے میرے قتل یا نااہلی کا انتظار کررہے ہیں، اگر آج نامعلوم پیچھے ہٹ جائیں تو یہ حکومت ختم ہو جائے گی، یہ اپنے امپائر کھڑے کرکے کھیلنے کو لیول پلیئنگ فیلڈ کہتے ہیں،الیکشن کمیشن کی انتخابات ملتوی کرنے کی وجوہات غلط ہیں،اکتوبر تک تو معاشی بحران اور زیادہ شدید ہو جائے گا۔اسلام آباد ہائیکورٹ میں پیشی کے موقع پر صحافیوں سے غیررسمی گفتگو کرتے ہوئے چیئرمین پاکستان تحریک انصاف عمران خان نے ایک سوال کہ ملک میں اس وقت فیصلے کر کون رہا ہے؟پر جواب دیا کہ اس جواب تو سب کو معلوم ہے۔رانا ثناء اللہ کے بیان سے متعلق سوال پر عمران خان نے کہاکہ خواہش تو یہی ہے کہ دونوں ہی رہیں، لیکن اگر وہ کہہ رہے ہیں کہ ایک ہی رہے گا تو بتا دوں کہ وہ نہیں رہیں گے۔
انہوں نے کہاکہ اگر آج نامعلوم پیچھے ہٹ جائیں تو یہ حکومت ختم ہو جائے گی۔ انہوں نے الیکشن کمیشن کی انتخابات ملتوی کرنے کی وجوہات کو غلط قرار دیتے ہوئے کہا کہ اکتوبر تک تو معاشی بحران اور زیادہ شدید ہو جائے گا۔لیول پلینگ فیلڈ سے متعلق سوال پر عمران خان نے کہا کہ ان کیلئے اپنے امپائر کھڑے کرکے کھیلنا ہی لیول پلینگ فیلڈ ہے، نواز شریف اس انتظار میں بیٹھا ہے کہ مجھے قتل یا نا اہل کیا جائے تو وہ واپس آئے۔گرفتاری دینے کے حوالے سے سوال پر چیئرمین پی ٹی آئی نے کہاکہ جب کوئی جرم ہی نہیں کیا تو گرفتاری کس لئے دوں۔
