لاہور (گلف آن لائن) لاہور ہائیکورٹ نے سابق وزیر اعلی پنجاب چودھری پرویز الٰہی کی 2 مقدمات میں حفاظتی ضمانت کی درخواستیں واپس لینے کی بنیاد پر کیس نمٹا دیا۔ہائیکورٹ کے جسٹس امجد رفیق نے پرویز الٰہی کی 2 مقدمات میں حفاظتی ضمانت کی درخواست پر سماعت کی، سابق وزیراعلی پنجاب کے سینئر وکیل عدالت میں پیش نہ ہوئے۔جونئیر وکیل نے بتایا کہ منی لانڈرنگ کے مقدمے میں چودھری پرویز الٰہی جوڈیشل ہوچکے ہیں۔
جونیئر وکیل نے عدالت سے استدعا کی کہ ہم درخواستیں واپس لینا چاہتے ہیں۔عدالت نے حفاظتی ضمانت کی درخواستیں واپس لینے کی بنیاد پر کیس نمٹا دیا۔یاد رہے کہ پرویز الٰہی نے اینٹی کرپشن اور منی لانڈرنگ کے مقدمے میں حفاظتی ضمانت کے لیے لاہور ہائیکورٹ سے رجوع کیا تھا۔پرویز الٰہی کی جانب سے دائر درخواست میں ایف آئی اے اور پولیس سمیت دیگر کو فریق بنایا گیا تھا۔درخواست میں موقف اپنایا گیا تھا کہ پرویز الٰہی سابق وزیر اعلی پنجاب رہے، ان کے خلاف سیاسی بنیادوں پر مقدمات درج کیے جارہے ہیں، عدالت مقدمات کی تفصیلات فراہم کرے۔درخواست میں استدعا کی گئی کہ عدالت منی لانڈرنگ کے مقدمے میں پرویز الٰہی کی حفاظتی ضمانت منظور کرے۔
