نئی دہلی (گلف آن لائن)بھارتی کرکٹ بورڈ نے دورہ آئرلینڈ کے دوران کوچنگ اسٹاف کو آرام دینے کا فیصلہ کیا ہے۔میڈیارپورٹ کے مطابق بھارتی بورڈ نے کہا کہ دورہ آئرلینڈ کیلئے راہول ڈریوڈ اور دیگر سپورٹ اسٹاف کو آرام دیا جائے گا۔بھارتی میڈیا کے مطابق راہول ڈریوڈ اور دیگر سپورٹ اسٹاف ویسٹ انڈیز کے خلاف ہونے والی ٹی ٹوئنٹی سیریز کے بعد وطن واپس آجائیگا۔
دورہ ویسٹ انڈیز کے بعد بھارتی کرکٹ ٹیم نے آئرلینڈ کا دورہ کرنا ہے، دورہ آئر لینڈ کے لیے نیشنل کرکٹ اکیڈمی کا اسٹاف ذمے داریاں نبھائے گا۔بھارتی میڈیا کے مطابق آئرلینڈ میں بھارتی ٹیم نے 3 ٹی ٹوئنٹی میچز کی سیریز کھیلنی ہے، دورے کے دوران وی وی ایس لکشمن سپورٹ اسٹاف کے ہیڈ ہوں گے۔
میڈیا رپورٹس کے مطابق فیصلے کا مقصد ایشیا کپ اور ورلڈ کپ کے لیے منصوبہ بندی کرنا ہے۔بھارت نے ویسٹ انڈیز میں 2 ٹیسٹ، 3 ون ڈے اور 5 ٹی ٹوئنٹی میچز کھیلنے ہیں۔ویسٹ انڈیز کے خلاف پہلے ٹیسٹ میں بھارت نے ایک اننگز اور 141 رنز سے کامیابی حاصل کی تھی۔
