لاہور(گلف آن لائن)پاکستان سٹون ڈویلپمنٹ کمپنی کے بور ڈ آف ڈائریکٹرز کے رکن خادم حسین نے وفاقی حکومت کی طرف سے کابینہ کی منظوری کے بعد 25رکن سرمایہ کاری بورڈ کی تشکیل کو خوش آئند قرار دیتے ہوئے کہا کہ سرمایہ کاری بورڈ میں12سرکاری اور13ارکان نجی شعبے سے شامل ہونگے جس میں صنعتی و تجارتی شعبہ سے وابستہ افراد کی شمولیت سے ملکی و غیر ملکی سرمایہ کاری میں اضافہ ہوگا ۔
انہوںنے کہا کہ ملک میں آنے والی نگران حکومت پر بھاری ذمہ داری عائد ہوتی ہے کہ وہ ملک میں غیر ملکی سرمایہ کاری کے فروغ کیلئے صنعتکاروں و تاجر برادری کو مراعات دے تاکہ ملک میں سرمایہ کاری میں اضافہ سے معیشت مستحکم ہوانہوںنے کہا کہ سرمایہ کاری بورڈ کی تشکیل سے غیر ملکی سرمایہ کاری بڑھے گی، غیر ملکی ملکی سرمایہ کاری میں اضافہ سے ہی معاشی استحکام آئے گا اور غیر ملکی سرمایہ کاری میں اضافہ سے نئی انڈسٹریز کا قیام عمل میں آئے گا جس سے ملکی برآمدات میں اضافہ سے حکومتی برآمدی اہداف پور ے ہونگے اور ملکی زرمبادلہ کے ذخائر میں اضافہ سے ملک کو معاشی بحران سے نجات ملے گی اور ملک خوشحالی و ترقی کی راہوں پر گامزن ہوگا۔
انہوںنے کہا کہ غیر ملکی سرمایہ کاری میں اضافہ کیلئے حکومت بیرون ملک پاکستانی سفارتخانوں میں تعینات ٹریڈ آفیسر ز کو فعال بنائیں تاکہ وہ بیرون ملک سرمایہ کاروں کو پاکستان میں سرمایہ کاری کی جانب راغب کریں ۔غیر ملکی سرمایہ کاری میں اضافہ سے ملکی معیشت مضبوط ہونے کے ساتھ حکومت کو مزید قرضوں سے نجات ملے گی،انہوںنے کہا کہ وون ونڈو آپریشن کی سہولت، خصوصی سہولت کونسل برائے سرمایہ کاری سے غیر ملکی سرمایہ کاری بڑھے گی۔
ان خیالات کااظہار انہوںنے فیروز پور بورڈ کے تاجروں کے وفد سے گفتگو کرتے ہوئے کیا۔فائونڈر گروپ کے رہنما میاں محمد اشرف نے کہا کہ معاشی بحالی کیلئے براہ راست غیر ملکی سرمایہ کاری کلیدی حیثیت رکھتی ہے غیر ملکی سرمایہ کاری میں اضافہ سے روزگار کے نئے مواقع پیدا ہونگے،نوجوانوں اور خواتین کو روگار ملے گاترقی کی نئی راہیں کھلیں گی۔
