کراچی (نمائندہ خصوصی)سفیر یورپی یونین برائے پاکستان ڈاکٹر رینا کیونکا نے کہا ہے کہ امید ہے کہ پاکستان میں عام انتخابات صاف و شفاف طریقے سے مقررہ وقت پر ہوں گے۔
ایک انٹرویو میں یورپی یونین کی سفیر برائے پاکستان ڈاکٹر رینا کیونکا نے کہا کہ انتخابات میں تمام جماعتوں کو برابرکے مواقع فراہم ہونے چاہئیں۔انہوںنے کہاکہ گزشتہ 4 الیکشن میں ہم نے انتخابات کے دوران آزاد مبصر بھیجے، پاکستان میں انتخابی مہم جاری ہے، اب بھی آزاد مبصر بھیجیں گے۔
یورپی یونین کی سفیر برائے پاکستان نے کہا کہ خواتین کے لیے اضافی مراعات کا سوچا جا رہا ہے، پاکستانی تاجروں کے لیے سرجیکل آلات اور اسپورٹس گڈز بھی یورپی ممالک بھیجنے کے مواقع ہیں۔انہوں نے کہا کہ پاکستان کے مختلف علاقوں کا دورہ کیا اور کبھی بور نہیں ہوئی، اس مرتبہ کراچی میں میرا فوکس ٹریڈ ہے۔ڈاکٹر رینا کیونکا نے کہا کہ پاکستانی بزنس کمیونٹی اور بزنس آرگنائزیشنز سے تجارت میں مواقع کے حوالے بات چیت ہو رہی ہے۔
انہوں نے بتایا کہ جی ایس پی پلس خودمختار تجارتی رعایت ہے، پاکستانی تاجر یورپی یونین کو ڈیوٹی فری سامان بھیج سکتے ہیں۔یورپی یونین کی سفیر برائے پاکستان نے کہا کہ 50 سے زائد ممالک میں 2024 میں انتخابات ہو رہے ہیں، جہاں اس سال 2 ارب لوگ اپنا حقِ رائے دہی استعمال کریں گے۔ڈاکٹر رینا کیونکا نے کہا ہے کہ پاکستان کے لیے ٹیکسٹائل ایکسپورٹ کرنا ہے، چمڑے کی مصنوعات، اسپورٹس اور سرجیکل گڈز کے بھی مواقع ہیں۔
