مکہ مکرمہ (نمائندہ خصوصی)مسجد الحرام اور مسجد نبوی سمیت سعودی عرب کی 12 ہزار سے زائد مساجد میں نماز عید کے اجتماعات ہوئے۔ شیخ عبدالرحمن السدیس نے مسجدالحرام میں خطبہ دیا۔حرمین شریفین میں لاکھوں فرزندان اسلام نے عید الاضحیٰ کی نماز ادا کی ، پاکستانیوں کی بڑی تعداد نے بھی نمازعید کے اجتماعات میں شرکت کی۔
مسجد الحرام اور مسجد نبوی میں عید الضحیٰ کی نماز کے روح پرور اجتماعات منعقد ہوئے۔نماز کی ادائیگی کے بعد فضا عید کی تکبیرات کے ورد اور اللہ اکبر کی صداؤں سے گونج اٹھی، عید الضحیٰ کی نماز کے لیے مسجد الحرام اور مسجد نبوی ، میں لاکھوں عازمین حج اور مقامی افراد شریک ہوئے۔
سعودی عرب میں عید الضحیٰ کی نماز کے سب سے بڑے اجتماع کے موقع پر حرم شریف کے شیخ الحدیث عبدالرحمان السدیس نے عید کی نماز کا خطبہ دیا۔حجاج کرام سنتِ ابراہیمی کی ادائیگی کرتے ہوئے جانوروں کی قربانی کریں گے اور قربانی کے بعد احرام کھول دیے جائیں گے۔اس موقع پر اسلام کی سر بلندی، امتِ مسلمہ کی سلامتی اور ترقی کے لیے خصوصی دعائیں کی گئیں۔
