اسلام آباد(نمائندہ خصوصی)وفاقی وزیر اطلاعات عطااللہ تارڑ نے کہاہے کہ پاکستان کا مستقبل محفوظ ہاتھوں میں ہے اور کوئی بھی شخص یا قوت پاکستان کو نقصان نہیں پہنچا سکتی،حکومت نے فلسطین کے 200طلبہ کو پاکستانی اداروں میں داخلے دئیے ،پاکستان 1967سے پہلے والی فلسطینی ریاست کی بحالی چاہتا ہے۔منگل کواسلام آباد میں نیشنل یوتھ سمٹ سے خطاب کرتے ہوئے وفاقی وزیر عطا تارڑ نے کہا کہ تقریب میں شریک تمام مندوبین کو خوش آمدید کہتا ہوں، پاکستان کے بہترین اور ہنرمند نوجوان تقریب میں موجود ہیں۔
عطا تارڑ نے کہا کہ پاکستان کی بنیاد ایک خواب پر رکھی گئی، علامہ اقبال کے خواب کو قائداعظم نے تعبیر دی، نوجوانوں نے قائداعظم کے کندھے سے کندھا ملا کر آزادی حاصل کی، نوجوانوں نے گلی گلی، قریہ قریہ میں پاکستان کا مطلب کیا لا الہ اللہ کا نعرہ پہنچایا۔
انہوں نے کہا کہ اللہ کا شکر ہے کہ پاکستان ہنرمند نوجوانوں کا ملک ہے، پاکستان کی نوجوان آبادی ملکی ترقی میں اہم کردار ادا کر رہی ہے اور ہر فورم پر نوجوان پاکستان کی نمائندگی کر رہے ہیں، پاکستانی نوجوان دنیا کے منظرنامے کو منفرد شکل دینے کی صلاحیت رکھتے ہیں۔عطا تارڑ نے کہا کہ نوجوانوں کو بااختیار بنانا وقت کا تقاضا ہے اور حکومت نوجوانوں کو بااختیار بنانے کے لیے مختلف اقدامات کر رہی ہے، ملکی معیشت کی مضبوطی کیلئے حکومت دن رات کوشاں ہے۔وفاقی وزیر نے کہاکہ ہم نے فلسطین کے 200طلبہ کو پاکستانی اداروں میں داخلے دئیے، اسرائیل نہتے فلسطینیوں کی نسل کشی کر رہا ہے، اقوام عالم فلسطینیوں کی نسل کشی کو رکوانے کیلئے اپنا کردار ادا کرے، پاکستان 1967سے پہلے والی فلسطینی ریاست کی بحالی چاہتا ہے۔
