لاہور( نمائندہ خصوصی)وزیر تعلیم رانا سکندر حیات نے کہا ہے کہ سموگ کے بڑھتے اثرات کے پیش نظر تمام اضلاع میں سکولز بند کر رہے ہیں۔ یہ فیصلہ اضلاع کی جانب سے مسلسل موصول ہونے والی شکایات کی روشنی میں کیا گیا ہے۔ وزیر تعلیم نے کہا کہ تعلیمی نقصان کا احساس ہے، مگر تعلیمی ادارے بند کرنے کا اقدام مجبورا اٹھا رہے ہیں۔ انہوں نے کہا کہ بچوں کو مہلک اثرات سے بچانے کیلئے یہ انتہائی فیصلہ کرنا پڑا ہے۔ وزیر تعلیم نے کہا کہ انسداد سموگ کیلئے عوام بھی شعور کا مظاہرہ کرتے ہوئے اپنی گاڑیوں کی فٹنس یقینی بنائیں۔ انہوں نے کہا کہ سموگ کے اثرات میں کمی لانے اور بچوں اور عوام کی سیفٹی کیلئے حکومت اپنے تئیں اقدامات کر رہی ہے۔
عوام بھی حکومت کے ساتھ تعاون کریں اور جو اپنے طور پر کیا جا سکتا ہے، کم از کم وہ ضرور کریں اور حکومتی ہدایات پر عملدرآمد یقینی بنائیں۔ وزیر تعلیم نے کہا کہ آن لائن تدریس میں مشکلات کے پیش نظر متبادل سٹریٹیجی پر کام کیا جا رہا ہے۔ جلد اس حوالے سے بھی مناسب لائحہ عمل تشکیل دیا جائے گا۔ انہوں نے کہا کہ تمام سرکاری اور نجی سکولز 17 نومبر تک بند رکھے جائیں گے۔
