اسلام آباد(گلف آن لائن)وفاقی وزیر اطلاعات فواد چوہدری نے کہا ہے کہ تمام اتحادی جماعتیں ہمارے ساتھ ہیں اور اپوزیشن تحریک عدم اعتماد میں کبھی کامیاب نہیں ہو گی۔وفاقی وزیر اطلاعات و نشریات فواد چوہدری نے اسپیکر قومی اسمبلی اسد قیصر سے ملاقات کی جس میں ملک کی مجموعی سیاسی صورت حال سمیت باہمی دلچسپی کے امور پر تبادلہ خیال کیا گیا۔
اسد قیصر اور فواد چوہدری کے درمیان ہونے والی ملاقات میں قومی اسمبلی کے آئندہ اجلاس کے حوالے سے اہم امور بھی زیر غور آئے۔اس موقع پر فواد چوہدری نے کہا کہ اپوزیشن کی تحریک عدم اعتماد کا آئینی طریقے سے جواب دیں گے، اپوزیشن کو تحریک عدم اعتماد میں کبھی کامیابی نہیں ہو گی۔وفاقی وزیر نے کہاکہ تمام اتحادی ہمارے ساتھ ہیں اور پی ٹی آئی کی قیادت پر مکمل اعتماد کا اظہار کرتے ہیں، ہمارے پاس اپوزیشن کی تحریک عدم اعتماد کا دفاع کرنے کی پوری صلاحیت موجود ہے۔حکومت مخالف اپوزیشن اتحاد کو تنقید کا نشانہ بناتے ہوئے فواد چوہدری نے کہا کہ پاکستان ڈیمو کریٹک موومنٹ (پی ڈی ایم) کی اپنی صفوں کے اندر یکسوئی نہیں ہے۔
