لاہور (گلف آن لائن) پاکستان نے چھٹی بار ٹی ٹونٹی ورلڈکپ کے سیمی فائنل میں رسائی حاصل کر کے اپنا ہی ریکارڈ بہتر کرلیا۔ایڈیلیڈ میں بنگلہ دیش پر فتح کے ساتھ پاکستان نے چھٹی بار ٹی ٹونٹی ورلڈکپ کے سیمی فائنل میں جگہ بناتے ہوئے اپنا ہی ریکارڈ بہتر کرلیا۔گرین شرٹس نے اس سے قبل 2007، 2009، 2010، 2012اور 2021میں فائنل فور مرحلے کیلئے کوالیفائی کیا تھا، 2014اور 2016میں ٹیم پہلے مرحلے میں ہی ٹورنامنٹ سے باہر ہوگئی تھی، سری لنکا، ویسٹ انڈیز اور بھارت نے 4،4 جبکہ آسٹریلیا نے 3 مرتبہ سیمی فائنل کھیلا ہے، اگر حالیہ ورلڈکپ میں پاکستان نے سیمی فائنل جیت لیا تو تیسری بار فائنل کھیلنے والی پہلی ٹیم کا اعزاز بھی حاصل ہوجائے گا۔یاد رہے کہ گرین شرٹس نے 2009ء میں یونس خان کی قیادت میں پہلی اور آخری بار ٹائٹل جیتا تھا، لارڈز کے تاریخی میدان میں کھیلے گئے فائنل میں پاکستان نے سری لنکا کو شکست دی تھی۔
بابر اعظم ٹی ٹونٹی ورلڈکپ میں 2بار سیمی فائنلز تک رسائی پانے والے پہلی پاکستانی کپتان کے طور پر اپنا نام درج کرانے میں کامیاب ہوگئے ہیں۔دریں اثنا شاداب خان نے شاہد آفریدی کا ملک کیلئے سب سے زیادہ وکٹیں حاصل کرنے کا ریکارڈ برابر کر دیا، بنگلہ دیشی بیٹر شکیب الحسن کو آٹ کرکے آل رائونڈر کی وکٹوں کی تعداد 97 ہو گئی، انھوں نے یہ سنگ میل 82 میچز میں عبور کیا، شاہد آفریدی نے98 میچز میں اتنے ہی شکار کیے تھے۔
