شرم الشیخ(نیوز ڈیسک)وفاقی وزیر برائے موسمیاتی تبدیلی سینیٹر شیری رحمان نے کہا ہے کہ پاکستان ایک تکلیف دہ اور تباہ کن سیلاب سے گزرا ہے جس سے 33 ملین سے زائد افراد متاثر ہوئے ہیں،معاش کے ذرائع، زراعت اور خوراک شدید متاثر ہوئے ہیں اور صدی کے ریکارڈ سیلاب نے پورے ملک کی ٹوپوگرافی کو تبدیل کر دیا ہے۔ ان خیالات کا اظہار انہوں نے کوپـ27 میں انٹرنیشنل واٹر مینجمنٹ انسٹی ٹیوٹ اور ایف اے او کے زیر اہتمام واٹر پویلین میں اعلیٰ سطحی سیگمنٹ: تھیمیٹک ڈے 3 ”ڈیزاسٹر رسک ریڈکشن (ڈی آر آر) اور بہتر معاش کے لیے پائیدار شہر” سے خطاب کرتے ہوئے کیا۔ انہوں نے کہا کہ پاکستان کا تقریباً ایک تہائی حصہ سیلانی پانی میں ڈوب گیا ہے اور آفت کے بعد کی ضروریات کے تخمینے کے مطابق مجموعی طور پر 30 بلین ڈالر کا نقصان ہوا ہے۔
انہوں نے کہا کہ معاش کے ذرائع، زراعت اور خوراک شدید متاثر ہوئے ہیں اور صدی کے ریکارڈ سیلاب نے پورے ملک کی ٹوپوگرافی کو تبدیل کر دیا ہے۔ انہوں نے اس سال پاکستان میں سیلاب سے ہونے والے نقصانات اور سیلاب کے خطرے کے انتظام، موافقت اور دریائے سندھ کے نظام کی لچک میں لیونگ انڈس انیشی ایٹو کی اہمیت پر زور دیا۔ پاکستان کی بحالی اور موافقت کی ضروریات پر بات کرتے ہوئے وفاقی وزیر نے لیونگ انڈس انیشی ایٹو کا ایک جائزہ پیش کیا اور بتایا کہ یہ کس طرح سندھ طاس کے ماحولیاتی نظام کو بحال کرنے میں مدد کرے گا۔ انہوں نے کہا کہ پاکستان کی حدود میں خاص طور پر سیلاب جیسی قدرتی آفات کے دوران دریائے سندھ کے نظام کی ماحولیاتی صحت کو بحال کرنا ہماری آب و ہوا کی پائیداری کو یقینی بنانے کے لیے ایک اہم قدم ہے۔ وفاقی وزیر شیری رحمن نے شرم الشیخ میں کوپـ27 کے پاکستان پویلین میں ”دی لیونگ انڈس،این ایکسز آف ایڈاپٹیشن” کے عنوان سے پینل ڈسکشن سے بھی خطاب کیا۔
ان کے ساتھ وفاقی وزیر تجارت سید نوید قمر، پاکستان میں اقوام متحدہ کے ریزیڈنٹ کوآرڈینیٹر جولین ہارنیس اور انوائرمنٹ جرنلسٹ عافیہ سلام بھی موجود تھیں۔ پینل کے ماڈریٹر احمد رفیع عالم تھے۔ انہوں نے کہا کہ یہ ایک زبردست منصوبہ ہے، اس حوالے سے سرمایہ کار اور کثیر الجہتی تنظیمیں سرمایہ کاری کو ترجیح دے سکتی ہیں، دریائے سندھ ہماری تہذیب کا محور ہے،ہمیں اسے دوبارہ زندہ کرنے کی ضرورت ہے، دریائے سندھ کا نظام ہر صوبے سے گزرتا ہے اور ہمیں سندھ طاس کے تحفظ کے لیے کنسورشیم اپروچ کی ضرورت ہے، اور ساتھ ہی ان کمیونٹیز کی تعمیر نو کی ضرورت ہے جنہوں نے سیلاب میں اپنا سب کچھ کھو دیا ہے۔ زمینی سطح پر کئی پروجیکٹ ہیں جو سیلاب کے خطرے اور معاش پر مرکوز ہیں، جن میں حیاتیاتی تنوع اور ماحولیاتی نظام کی بحالی کی ضروریات کا بھی جائزہ لینا چاہیے۔ پاکستان میں اقوام متحدہ کے ریزیڈنٹ کوآرڈینیٹر جولین ہارنیس نے کہا کہ پاکستان کے شہری موسمیاتی تناؤ کے پیمانے کو اچھی طرح سمجھتے ہیں، لیکن اس حوالے سے لچک پیدا کرنے کے لیے بڑے پیمانے پر کوششوں کی ضرورت ہے۔ انہوں نے وضاحت کی کہ پاکستان کے لیے سب سے بڑا مسئلہ خطرے سے دوچار اس کا دریائی نظام ہے، اور اس کے انہدام سے زیادہ خوفناک کوئی چیز نہیں ہے، اس لیے کہ پاکستان میں 90 فیصد زندگی کا انحصار فعال دریائی نظاموں پر ہے۔ اس کے علاوہ کوپـ27 میں اپنی مصروفیات میں، وفاقی وزیر نے یو این ای پی کی ایگزیکٹو ڈائریکٹر انگر اینڈریسن کے ساتھ دو طرفہ ملاقات کی۔ اینڈریسن نے سیلاب کے بحران سے ہونے والی تباہی اور جانی و مالی نقصان پر وزیر سے تعزیت کی۔
انہوں نے ملک کو اس کے تحفظ اور موافقت کی کوششوں خاص طور پر دی لیونگ انڈس جیسے منصوبوں کے لیے فنڈز فراہم کرنے میں مدد فراہم کرنے پر زور دیا۔ شیری رحمان نے مصر کے آبی وسائل اور آبپاشی کے وزیر ہانی سیولم اور ایشیائی ترقیاتی بینک کے ایک وفد سے بھی ملاقات کی۔ انہوں نے دریائے نیل اور سندھ کے لیے آب و ہوا کی لچک کے بارے میں علم اور تجربات کے تبادلے کے بارے میں تبادلہ خیال کیا۔ اے ڈی بی کے وفد کے ساتھ ملاقات میں موسمیاتی لچک کو بہتر بنانے اور 2022 کے تباہ کن سیلاب کے بعد دوبارہ بہتر بنانے کے لیے پاکستان کے ساتھ تعاون کے راستے تلاش کرنے پر توجہ مرکوز کی گئی۔ کوپـ27 میں پاکستان پویلین نے پاکستانی گلیشیئرز کے علاوہ بلائنڈ ڈولفن اور برفانی چیتے جیسی انواع کی واپسی جیسے موضوعات پر پینل مباحثوں کی بھی میزبانی کی۔
