ا سلام آباد (گلف آن لائن)وزیراعظم شہبازشریف نےسی پیک کے دس سال مکمل ہونے پر چین اورپاکستان کو مبارکباد دیتے ہوئے کہا ہے کہ چین اور پاکستان آئرن برادر ز ہیں، سی پیک اس آزمودہ سدا بہار بااعتماد سٹرٹیجک کوآپریٹو پارٹنرشپ کا ایک نیا باب ہے۔ بدھ کو وزیراعظم آفس کے میڈیاونگ سے جاری بیان کے مطابق وزیراعظم نے کہا کہ پاکستان اور چین کی قیادت اور عوام کو مبارک پیش کرتا ہوں کہ سی پیک کو دس سال مکمل ہوگئے ہیں۔ انہوںنے کہاکہ چین اور پاکستان آئرن برادر ز ہیں، سی پیک اس آزمودہ سدا بہار بااعتماد سٹرٹیجک کوآپریٹو پارٹنرشپ کا ایک نیا باب ہے۔
انہوںنے کہاکہ سی پیک چین کے عظیم رہنما شی جن پنگ اور قائد محمد نوازشریف کے ترقی سب کے لئے وڑن کا شاندار نمونہ ہے۔ انہوںنے کہاکہ بیلٹ اینڈ روڈ منصوبہ صدر شی جن پنگ کی امن، دوستی، معاشی شراکت داری اور بقائے باہمی کی سوچ کا مظہر ہے۔ انہوںنے کہاکہ سی پیک صدر شی جن پنگ کا پاکستان کے عوام کے لئے تحفہ ہے ۔ انہوںنے کہاکہ افسوس ہے کہ چار سال سی پیک کی راہ میں رکاوٹ آئی، چین جیسے عظیم دوست پر بے بنیاد الزامات عائد ہوئے۔
انہوںنے کہاکہ سی پیک کے دشمن پاکستان اور خطے میں ترقی، امن، خوش حالی کے دشمن ہیں، وہ نہیں چاہتے کہ ہمارے عوام کو غربت سے نجات ملے۔انہوںنے کہاکہ سی پیک پر کام کی رفتار دوگنا کررہے ہیں، یہ غربت ، بے روزگاری اور معاشی بدحالی کے خاتمے کا منصوبہ ہے ۔ انہوں نے کہا کہ بھارت کو بھی سی پیک کے راستے میں رکاوٹ بننے کے بجائے اس کے ثمرات سے فائدہ اٹھانا چاہیے۔ انہوںنے کہاکہ سی پیک سے ایران، افغانستان، وسط ایشیا اور پورے خطے کو ثمرات ملیں گے۔
انہوںنے نکہاکہ یہ محض روڈ، ریل، سمندری اور فضائی راستوں میں بہتری کا ہی نہیں، صحت، تعلیم، ہنرمندی اور ترقی کے عمل میں حصہ داری کا شاندار منصوبہ ہے۔ انہوںنے کہاکہ سی پیک خطوں اور علاقوں کو ہی نہیں عوام کے دِل جوڑنے کا بھی خوبصورت منصوبہ ہے۔ وزیراعظم نے کہاکہ یہ گلوبلائزیشن میں اکنامک ریجنلائزیشن کا گیم چینجر منصوبہ ہے،یہ ہمارے خطے میں عوام کا معیار زندگی بلند کرنے اور انہیں غربت سے نکال کر امن سے رہنے کا سفر ہے۔
انہوڈںنے کہاکہ سی پیک پاکستان اور چین کے دوطرفہ تعلقات کو فولادی بنانے کا ذریعہ اور باہمی شراکت داری کے نئے دور کا آغاز ہے۔ انہوںنے کہاکہ اس میں فراہمی آب سے لے کر تعلیم وفنی تربیت ، ہنرمندی تک کے منصوبے شامل ہیں،ملک بھر میں 9 سپیشل اکنامک زونز کی تعمیر سے ٹیکنالوجی کی منتقلی ہوگی، صنعتی اشتراک عمل اور مقامی پیداوار میں اضافہ ہوگا۔انہوںنے کہاکہ این ڈی ایم اے کی استعداد کار میں اضافہ اور قدرتی آفات سے بچائو کے لئے پیشگی اقدامات بھی سی پیک کا حصہ ہیں۔ انہوںنے کہاکہ زراعت کی ترقی کے لئے مشترکہ منصوبے بھی اس میں شامل ہیں جس سے غذائی تحفظ یقینی ہوگا۔
