کراچی(نیوز ڈیسک)اداکارہ اشنا شاہ نے کہا ہے کہ اگر طلاق یافتہ خاتون کا کردار ملے تو خوشی خوشی نبھائوں گی۔سوشل میڈیا سائٹ ایکس پر پوسٹ میں اشنا شاہ نے کہا ہے کہ میں نے بہت سے ایسے سکرپٹ میں کام کیا ہے جن میں طلاق کو منفی انداز میں دکھایا گیا ہے، اگرچہ میں سکرپٹ تبدیل نہیں کرسکتی کیونکہ یہ میرے کام کا حصہ نہیں ہے لیکن طلاق سے متعلق میرے خیالات بالکل مختلف ہیں۔
اپنے والدین کا تذکرہ کرتے ہوئے انہوں نے کہا کہ میرے والدین کی بھی علیحدگی ہوگئی ہے ،میری والدہ نے ہمیں سنگل پیرنٹ کے طور پر پالا ہے، ہماری بہترین پرورش اور دیکھ بھال کیلئے تین ملازمتیں کیں۔ انہوں نے کہا کہ میں ایسی کہانی کا حصہ بننا چاہتی ہوں جس میں طلاق یافتہ خاتون کو مثبت انداز میں دکھایا جائے اور پیغام دیا جائے کہ طلاق کے بعد بھی خوشحال زندگی گزاری جاسکتی ہے۔
انہوں نے کہا کہ ایسا کردار ہو جس میں طلاق یافتہ خاتون خود مختار زندگی گزار کر معاشرے میں مثال قائم کرے۔انہوں نے کہا کہ اس طرح کے سکرپٹ کیلئے پروڈیوسر کو راضی کرنا مشکل کام ہے ،ایسے ڈراموں پر عوام کی جانب سے سخت ردعمل کا سامنا کرنا پڑ سکتا ہے۔
٭٭٭٭٭
