لاہور (گلف آن لائن )ترجمان پنجاب حکومت حسان خاور نے کہا ہے کہ سیاسی منظر نامے سے غائب ہوتی غیر متحدہ اپوزیشن واپسی کے لیے ہاتھ پائوں مار رہی ہے، اپوزیشن جماعتیں حکومتی اتحادیوں کو کچھ آفر کرنے کی پوزیشن میں نہیں ہیں۔
ترجمان پنجاب حکومت حسان خاور نے اپنے بیان میں کہا ہے کہ نمبرز پورے ہونے کی دعویدار اپوزیشن جماعتیں حکومتی اتحادیوں کے در پر ماری ماری پھر رہی ہیں، نمبر گیم پوری ہوتی تو اپوزیشن لانگ مارچ کینسل کر کے فورا تحریک عدم اعتماد لاتی، اپوزیشن جماعتیں حکومتی اتحادیوں کو کچھ آفر کرنے کی پوزیشن میں نہیں ہیں۔
حسان خاور کا کہنا تھا کہ ن لیگ 1997 میں بھی ق لیگ کی مدد سے الیکشن جیت کر ان کو دھوکہ دے چکی ہے، جہانگیر ترین گروپ گزشتہ تین سال کی طرح آئندہ بھی حکومت کے ساتھ کھڑا رہے گا، فی الوقت جہانگیر ترین گروپ کے ساتھ ایسا کوئی اختلاف نہیں جو حکومت کے لیے تشویش کا باعث ہو۔
