لاہور (گلف آن لائن) وفاقی وزیر اطلاعات و نشریات مریم اورنگزیب نے سابق وفاقی وزیر اور سربراہ عوامی مسلم لیگ شیخ رشید احمد کی جانب سے نجی نیوز چینل کے رپورٹر کے ساتھ بدتمیزی کے واقعہ کی مذمت کی ہے۔ اپنے ایک بیان میں وفاقی وزیر مریم اورنگزیب کا کہنا تھا کہ جب ان کے پاس سوال کا جواب نہیں ہوتا تو یہ صحافیوں پر حملہ آور ہوتے ہیں،
پاکستان تحریک انصاف اور اس کے اتحادیوں کی تاریخ ہے کہ انہوں نے ہمیشہ صحافیوں اور صحافت کا گلا دبانے کی کوئی کوشش ہاتھ سے نہیں جانے دی۔ مریم اورنگزیب نے کہا کہ شیخ رشید جان لیں کہ آج وہ جہاں کھڑے ہیں اس میں صحافیوں اور میڈیا کا کلیدی کردار ہے، ہم اس قسم کے رویئے کی مذمت کرتے ہیں، شیخ رشید صاحب کو اپنے اس رویئے پر معافی مانگنی چاہئے۔
