اسلام آباد (گلف آن لائن )ڈسٹرکٹ اینڈ سیشن کورٹ اسلام آباد نے توشہ خانہ کیس میں چیئرمین پی ٹی آئی عمران خان کے ناقابلِ ضمانت وارنٹ سے متعلق تفصیلی حکم جاری کر دیا۔ایڈیشنل سیشن جج ظفر اقبال نے وارنٹِ گرفتاری جاری کرنے کا تفصیلی حکم جاری کر دیا۔تفصیلی حکم میں عدالت نے کہا کہ عمران خان توشہ خانہ کیس میں متعدد بار عدالتی پیشی پر غیر حاضر رہے، وہ آخری سماعت کے عدالتی اوقات کے اندرپیش نہیں ہوئے۔
عدالت نے کہا کہ عمران خان کی درخواست کے مطابق وہ جوڈیشل کمپلیکس میں پیشی کے باعث کچہری نہیں آ سکتے، صاف ظاہر ہو رہا ہے کہ عمران خان عدالتی پیشیوں کو اپنی ترجیحات کے مطابق رکھ رہے ہیں۔تفصیلی حکم میں عدالت نے کہا کہ توشہ خانہ کیس عمران خان کی ترجیحات میں شامل نہیں، حالانکہ وہ ضلعی کچہری سے چند منٹوں کی دوری پر تھے۔عدالت نے تفصیلی حکم میں کہا ہے کہ عمران خان کی درخواست قابلِ قبول نہیں، مسترد کی جاتی ہے، اْن کے ناقابلِ ضمانت وارنٹِ گرفتاری جاری کیے جائیں۔تفصیلی حکم میں عدالت نے کہا کہ عمران خان کو گرفتار کر کے 7 مارچ کو عدالت میں پیش کیا جائے، ان کی 7 مارچ کو عدالتی حاضری یقینی بنائی جائے۔
